Attwalità - Pubblikazzjonijiet - Pubblikaturi - Awturi - Djaspora - Fond

Paġni letterarji - Ixtri - Ħwienet - Għaqdiet - Distributuri - Premjijiet - Internet

Radju u Televiżjoni - Fieri  - Tradutturi, Traduzzjonijiet - Korsijiet - Ħoloq

Ara l-Arkivji  

• Is-Siegħa tal-Kittieba - Intervista lil Adrian Grima. Nhar il-Ħamis, 4 ta' Frar 2010, Dr Simone Galea se tintervista live lil Adrian Grima f'puntata oħra mis-sensiela IS-SIEGĦA TAL-KITTIEBA, li bħas-soltu se ssir fis-Sala tal-Mużika, fil-Kavallier ta' San Ġakbu, fis-7.30pm. Adrian Grima, li dan l-aħħar rebaħ il-Premju Speċjali għall-aktar ktieb kreattiv fl-2008 bil-ktieb Riħ min-Nofsinhar, huwa magħruf għall-poeżija impenjata tiegħu. Huwa jaħdem mal-grupp kulturali Inizjamed li jorganizza diversi attivitajiet kulturali matul is-sena, fosthom il-Festival Mediterranju tal-Letteratura ta' Malta, li sar appuntament annwali fil-kalendarju kulturali lokali. Minbarra li huwa poeta, illum il-ġurnata Grima qiegħed jagħmel isem bħala intellettwali impenjat u spiss ikun mistieden jikkontribwixxi f'kungressi u ġurnali, l-aktar b'taħditiet u artikli dwar il-Mediterran fl-aspett artistiku, soċjali u politiku tiegħu. Dr. Adrian Grima jgħallem il-letteratura Maltija fil-Fakultà tal-Arti. (Immanuel Mifsud)

• Nhar it-Tnejn 1 ta' Frar 2009, Kampanja Ktieb Kafè bdiet taħdem fil-Kavallier San Ġakbu: iktar minn mitt ktieb tpoġġew għad-dispożizzjoni tal-pubbliku. Hemm kotba għall-kbar kif ukoll kotba ġodda għat-tfal, bl-Ingliż u bil-Malti. (Nadia Mifsud)

• Ara r-riżultati kollha tal-Premju Nazzjonali tal-Ktieb għall-kotba ppubblikati fl-2008. Verżjoni pdf (folju 93)

• Spell it out! Wednesday, 27th JANUARY 2010, 8.15 p.m 3rd Open Reading at Chiaroscuro, Strait Street, Valletta. Everybody can read or just listen. It just should be a self-written text in Maltese, English or Italian. Bring as many acquaintances, relatives, friends and freaks, colleagues, writers and non-writers, musicians or just people who wanna listen with you.

• Erbghin Sena ta' Protesta - Intervista lil Mario Azzopardi. Nhar il-Ħamis 21 ta' Jannar 2010 tkompli s-sensiela IS-SIEGĦA TAL-KITTIEBA b'intervista live lil Mario Azzopardi, fis-Sala tal-Mużika tal-Kavallier ta' San Ġakbu, fis-7.30pm. Lura fis-snin sebgħin Mario Azzopardi kien deskritt bħala l-enfant terrible tal-letteratura Maltija, il-protagonist ta' ġenerazzjoni ta' kittieba li riedu jibdlu lil pajjiżhom bħalma riedu jagħmlu l-kontemporanji tagħhom fl-Ewropa u d-dinja tal-Punent. Ir-reazzjoni għall-predeċessuri, l-irreverenza, l-antagoniżmu, il-ħeġġa għall-impenn, il-kurżità "b'hemm barra" ... forsi kienu dawn il-karatterstiċi ewlenin ta' din il-ġenerazzjoni. Wara erbgħin sena kif se jiġi evalwat dak il-perjodu? Mario Azzopardi se jkun intervistat minn Immanuel Mifsud. Id-dħul, bħas-soltu, huwa b'xejn.

• Awturi dwar il-Libertà tal-Espressjoni (stqarrija: It-Tlieta, 12 ta’ Jannar, 2010) Aħna l-awturi hawn taħt iffirmati, nixtiequ nesprimu d-dispjaċir u n-nuqqas ta’ qbil tagħna mat-trażżin istituzzjonalizzat tal-espressjoni ħielsa f’pajjiżna.

  Bħala awturi, ma nistgħux naċċettaw l-implikazzjonijiet ta’ xi setgħa li teħodha fuqha nnifisha li tgħarbel u tiddeċiedi x’jista’ jinqara u x’ma jistax. F’Malta Ewropea tas-seklu wieħed u għoxrin, l-espressjoni għandha tkun ħielsa. Atti ta’ ċensura artistika jitfgħu dubji serji fuq ir-rispett tad-drittijiet u l-libertajiet fundamentali salvagwardjati fil-Kostituzzjoni.

  Hawn qegħdin nagħmlu aċċenn għar-rwoli importanti li għandhom il-kittieba f’kull soċjetà. Nisħqu fuq il-ħtieġa li kwistjonijiet urġenti bħal-libertà tal-espressjoni u l-istatus tal-artisti f’pajjiżna jitpoġġew fuq quddiem nett tal-aġenda nazzjonali; li jinbidlu b’mod immedjat l-liġijiet antikwati li jistgħu b’xi mod itellfu din il-libertà; u b’mod immedjat titwaqqaf kull prosekuzzjoni mill-pulizija li għandha x’taqsam ma’ dawn il-liġijiet antikwati.

  Aħna ma noġġezzjonawx għal sistema ta’ klassifikazzjoni li xogħolha jkun li tagħti parir lill-poplu dwar livelli ta’ kontenut adult fl-oqsma artistiċi, imma noġġezzjonaw bil-qawwa kollha għal dik iċ-ċensura li tinsulta l-intelliġenza u l-libertà tal-poplu Malti.  John Aquilina, Clare Azzopardi, Mario Azzopardi, Simon Bartolo, Norbert Bugeja, Mark Camilleri, Charles Casha, Antoine Cassar, Charles Colerio, Noel Fabri, Lino Farrugia, Charles Flores, Francis Galea, Sergio Grech, Maria Grech Ganado, Adrian Grima, Simone Inguanez, Gorġ Peresso, Ray Mahoney, Ġorġ Mallia, Albert Marshall, Immanuel Mifsud, Kevin Saliba, Andrew Sciberras, Karl Schembri, Loranne Vella, Vince Vella, Alex Vella Gera, Trevor Żahra.

• Nhar l-Erbgħa 30 ta' Diċembru, 20:00 - Maħżen XII, l-Imdina, Malta. Tnedija ta' Passaport, ktejjeb ġdid ta' Antoine Cassar, b'disinji ta' Asya Reznikov u Noel Tanti. Passaport poetiku, validu għall-popli kollha, u għal kull pajsaġġ. Kulħadd mistieden, twieled fejn twieled. Is-siwi tiegħek mhuwiex proporzjonali għall-popolazzjoni ta' pajjiżek. Dħul b'xejn, m'għandekx bżonn viżi jew timbri, il-bieb maqlugħ miċ-ċaċċiż. Lejla ta' poeżija, rakkonti, teatru u mużika, bis-sehem ta' Clare Azzopardi, Norbert Bugeja, Walid Nabhan, Tibet Society Malta, WhatsTheirNames Theatre, Robert Farrugia Flores (Plato's Dream Machine).
  Wara l-preżentazzjoni tal-Passaport, jintwera d-dramm qasir Seven Jewish Children, miktub minn Caryl Churchill bi tweġiba għall-attakk militari Iżraeljan fuq ix-xatt ta' Gaża, li bħalissa qed jitfakkar l-ewwel anniversarju tiegħu. Direzzjoni ta' Philip Leone-Ganado.
  
  Il-passaport jinbiegħ b'donazzjoni minima ta' €1, bid-dħul kollu jingħata lill-Migrants Solidarity Movement (http://www.migrantsmalta.org). Wara t-tnedija, il-passaport jista' jinkiseb mingħand il-ħanut L-Arka, 306 Triq San Pawl, il-Belt.
  *** B'solidarjetà mal-għadd bla tarf ta' individwi li, bil-passaport tagħhom jew mingħajru, ma jgawdux id-dritt fondamentali li jsiefru jew jidħlu lura f'pajjiżhom (Artiklu 13 tal-Istqarrija Universali tal-Jeddijiet tal-Bniedem) jew id-dritt fondamentali li jitolbu ażil mill-persekuzzjoni (Artiklu 14), kull min jattendi għat-tnedija huwa mitlub li jġib miegħu l-passaport, biex 'iċedih' simbolikament: il-passaporti ċeduti jiddendlu ma' spaga fuq il-palk, u jintraddu lura fi tmiem l-attività. ***
  http://antoinecassar.info
  http://www.facebook.com/event.php?eid=222617062289&ref=mf
  "[...]
  Tiegħek
  dan il-passaport
  għall-popli kollha,
  b'bandiera qawsalla, u b'arma ta' wiżża migratorja ddur mal-globu,
  bil-lingwi kollha li trid, uffiċjali u mhux,
  bil-qoxra kaħla oċean, jew ħamra demm niexef, jew sewda faħam lest għall-ħruq, agħżel int,
  ħudu fejn tixtieq, il-passaġġ sikur u mberraħ, il-bieb maqlugħ miċ-ċaċċiż,
  tista' tidħol u toħroġ bla biża', bla ħadd ma jwaqqfek,
  bla ħadd ma jaqbżek fil-kju jew jitfgħek wara nett, m'hemmx x'tistenna,
  bla ħadd ma jgħidlek Ihre Papiere bitte, iqabbdek it-takikardja bil-bjudija ta' sebgħu,
  bla ħadd ma jperreċ jew iwerreċ għajnejh skont il-prodott domestiku gross per capita tan-nazzjon li tħalli warajk,
  [...] "

• It-Tnejn, 14 ta' Diċembru, 2009, se jitniedu, fost l-oħrajn, dawn il-kotba mill-Malta University Press fl-Aula Magna tal-Università l-Qadima, Triq San Pawl, il-Belt Valletta, fis-6.30pm. Wara jkun hemm riċeviment. Ġużè Cutayar, Stħajjiltni Malti ta’ Ġewwa: Memorji ta’ Tuneż, b'daħla tal-Prof. Oliver Friggieri, u Oliver Friggieri, Storia della  Letteratura Maltese [1979] (facsimile edition), b'daħla tal-mibki Prof. Franco Lanza).

• Nhar it-Tlieta, 15 ta' Dicembru, f'Sala Couvre Porte, il-Birgu, fis-7.00pm, Horizons Communications flimkien mal-Kunsill tal-Birgu se jniedu l-ktieb It-Tifel tan-Nanna ta' Ġorġ Peresso. Se jkun hemm diversi kontribuzzjonijiet qosra minn Dr Adrian Grima u Joyce Guillaumier, filwaqt li l-awtur u Charles Abela Mizzi se jaqraw siltiet mill-ktieb.

• Bi pjaċir nixtiequ nistednuk għall-inawgurazzjoni tal-Kampanja Ktieb Kafè li se ssir fil-Chiaroscuro, 44, Triq id-Dejqa, il-Belt Valletta, nhar it-Tnejn, 21 ta’ Diċembru, 2009, fit-8.00 ta’ filgħaxija. Tista’ ġġib miegħek lil ħbiebek, lil qrabatek… kif ukoll xi kotba li forsi m’għandekx bżonn iktar.

• Invitation to the next "SPeLL it out! Open Reading Valletta" on Wednesday 16th December at 9 p.m. "Before Christmas come to the 2nd "SPeLL it out! Open Reading Valletta" Event, that will take place next Wednesday, 16th December, starting at 9 p.m., once again in the Chiaroscuro on Strait Street - and then continuing every LAST WEDNESDAY of the month! Read, play music or just enjoy listening and drinking in the Wine Bar! Come and tell your friends. Hope to seeing you there!" (Arndt)

• Nhar l-Erbgħa, 23 ta’ Diċembru, fis-7.30pm, Inizjamed se tippreżenta għadd ta’ xogħlijiet letterarji minn kittieba stabbiliti għal udjenza matura f’lejla bl-isem ta’ "Wiski doppju, silġa waħda - waqtiet ta' letteratura," f’mużew f’Bormla bl-isem ta’ Bir Mula Heritage, li jinsab f’79, Triq Santa Margerita, Bormla. Din l-attività se tkun parti minn programm imfassal mill-Kunsill Lokali ta' Bormla. L-isem tal-lejla, li se ddum madwar siegħa u kwart, huwa mnebbaħ minn novella ta’ Emanuel Psaila. S'issa kkonfermaw ukoll is-sehem tagħhom fil-lejla l-awturi Mario Azzopardi, Keith Borg, Norbert Bugeja, Maria Grech Ganado, Adrian Grima, Simone Inguanez, Walid Nabhan, u Charles Scerri.

• Bejn Linja (Ħadra) u Oħra - Intervista lil Clare Azzopardi. Nhar il-Ħamis 10 ta' Diċembru 2009, Dr Marco Galea se jintervista live lil Clare Azzopardi fis-Sala tal-Mużika tal-Kavallier ta' San Ġakbu, fis-7.30pm, intervista oħra mis-sensiela IS-SIEGĦA TAL-KITTIEBA. Clare Azzopardi reħbet il-premju letterarju bl-ewwel ġabra ta' novelli tagħha Il-Linja l-Ħadra. Minbarra proża hija tikteb ukoll drammi, bħal "L-Interdett Taħt is-Sodda", li ġie tradott u moqri fi Franza u ppubblikat ukoll f'verżjoni Għarbija. Uħud min-novelli tagħha nqalbu għal diversi lingwi, ippreżentati f'festivals u programmi letterarji barranin u ppubblikati f'diversi pajjiżi. Azzopardi taħdem ħafna wkoll fil-qasam tal-letteratura tat-tfal, bil-kitba ta' rumanzi u kotba għall-qari, kif ukoll bil-kumpilazzjoni ta' kitbiet għall-qarrejja żgħar. Clare Azzopardi tgħallem il-Malti fil-Kulleġġ tal-Università. Waqt l-intervista jkun hemm qari ta' siltiet ta' Clare Azzopardi mill-attriċi Sharon Bezzina u kummenti mużikali minn Alex Vella Gregory. Bħas-soltu, dħul b'xejn. (Immanuel Mifsud)

• Tnedija ta' Bliet, il-ktieb tal-poeżiji ta' Norbert Bugeja (Emma Delezio, 2009). Il-Ġimgħa, 11 ta' Diċembru, 2009, fit-8.00pm, fis-sala tal-mużika tal-Kavallier ta' San Ġakbu, il-Belt Valletta. Kulħadd mistieden.

• Ix-xogħol teatrali Is-Surmast ta' Trevor Żahra se jittella' fil-21 Novembru fis-19:30, 22 Novembru fl-16:00, 22 Novembru fis-19:30, direzzjoni ta' John Suda, fis-Sala Sir Temi Zammit, fl-Universita' ta' Malta, Tal-Qroqq. Jieħdu sehem John Suda, Mary Rose Mallia, Michael Tabone, Anthony Ellul, Simon Curmi, Ninette Micallef, Sean Buhagiar, Marcel Zammit Marmara', Miriam Fiteni, u Jeremy Abdilla. Biljetti minn St James Cavalier fuq 21223216 jew boxoffice@sjcav.org.

• Open Reading at Chiaroscuro, 44 Strait Street, Valletta. Wednesday, 25th November 2009, 8.15 pm. The concept is for authors or wannabe authors, poets or people who think they have something to say, something to share – anything which makes up sentences with words, traditional writers and storytellers as well as hip hop freestyle poets, slam-poets, just lovers of words... We want to invite you to this evening where you will have the chance to express yourself and share your work. Anyone who just wants to listen is very welcome, too. TWO rules only: It has to be your original work in English or Maltese and each reading shouldn’t be longer than 10 minutes. The evening will be moderated by Vince Fabri and Arndt Kremer, a native and an alien, both writers themselves. The event will take place in the Chiaroscuro Bar, giving a more informal atmosphere than literary evenings of this kind normally portray. Therefore it is linked to the tradition of permanent cultural events in bars which were especially common in 19th-century Europe. It is planned to have this evening every two weeks. The night will be accompanied by live music. See you there,
  Vince Fabri and Arndt Kremer.

• Ix-Xjentista u l-Kittieba - Rena Balzan Intervistata. Nhar il-Ħamis 26 ta’ Novembru 2009, fis-7.30pm, fis-sala tal-Mużika tal-Kavallier ta’ San Ġakbu, Rena Balzan tagħti intervista lil Simone Galea. Din l-intervista taħbat ir-raba’ waħda mis-sensiela ta’ intervisti “Is-Siegħa tal-Kittieba”, wara l-intervisti ma’ Pierre Mejlak, Maria Grech Ganado u Albert Marshall. Rena Balzan hija professur fid-Dipartiment tal-Bijoloġija fl-Università. Hija għandha dottorat fil-Bijoteknoloġija u l-Bijoloġija Molekulari. Minbarra li hija magħrufa fil-qasam tal-bijoloġija din ix-xjentista hija waħda mill-kittieba ewlenin tas-snin sebgħin u minbarra għadd ta’ poeżiji hija ppubblikat ukoll erba’ rumanzi. Bħalma saret it-tradizzjoni ta’ dawn l-intervisti, Rena Balzan se tagħlaq is-siegħa tagħha billi taqra xogħol ġdid li għadu ma ġiex ippubblikat. L-attriċi Sharon Bezzina taqra siltiet oħrajn ta’ Rena Balzan u l-pubbliku, bħas-soltu, ikollu l-opportunità li jagħmel l-interventi tiegħu. Id-dħul huwa b’xejn.

• Is-Sibt, 28 ta' Novembru, fis-7pm, fis-Sala tal-Lukanda Phoenicia, se jsir il-Festival - L-Għanja tal-Poplu, b'kanzunetti originali bil-Malti miktubin u kantati minn kantawturi li jitkellmu fuq diversi aspetti socjali tal-hajja Maltija. Din hija t-34 darba li qed isir. Ibbukkja billi ccempel 21233893 jew 99234500 jew info@ytc.org.mt. www.ghanjafest.com YTC - 227, triq il-Merkanti, Valletta

• It-Tifel tan-Nanna, ta’ Ġorġ Peresso (Pubblikazzjoni Horizons). Horizons għadha kif ħarġet it-tielet ktieb fis-sensiela tagħha ta’ kitibiet ta’ Ġorġ Peresso, bl-isem It-Tifel tan-Nanna. Dan hu awtobijografija imma li jwassal biss lill-awtur sa kemm jagħlaq erbatax-il sena. Sakemm daħal ‘boarder’ mal-Patrijiet u l-bieb ingħalaq fuq tfulitu. Hi ġabra ta’ stejjer marbuta ma’ tfulitu l-ewwel fil-Birgu, imbagħad Birkirkara u l-Gżira fi żmien il-gwerra, imbagħad f’Bormla mġarrfa u f’Ħaż-Żabbar. Id-dinja tat-tfulija tidher fl-innoċenza - jew fin-nuqqas tagħha -, fis-seħer u fil-ħolm, fid-devozjoni u fl-iskrupli ta’ tifel qed jikber mimli kurżità, fl-avventuri żgħar li jidhru kbar fid-dinja ċkejkna tal-familja u r-rabta tiegħu ma’ nanntu. U l-ħbieb tal-iskola u tat-triq. Hi dinja kważi tal-ħrejjef, għalkemm mhedda mit-twissija li kollox hu dnub u t-twiddiba tan-nar tal-Infern. Hemm xi ħaġa differenti f’din l-awtobijografija mhux tant fir-rakkonti daqskemm fil-mod kif Peresso jqajjimhom quddiemna. Peresso juża stil mexxej, nebbiexi u mqareb, imsaħħar, f’waqtiet riflessiv u f’waqtiet umoristiku. Ir-ritratt li joħroġ hu wieħed ta’ tifel, li minkejja kollox, kien kuntent li kien tifel żgħir jikber ma’ djul familtu u nanntu. U beża’ meta tilef tfulitu.
  Il-ktieb fih ukoll għadd ta’stampi. Ghal aktar informazzjoni żur horizons.com.mt.

• Ħareġ ir-rumanz ta' Charles Casha, martina@chat.com għall-adolexxenti (Klabb Kotba Maltin). F’dan il-ktieb, għall-qarrejja ta’ bejn l-11 u l-15-il sena, Casha qiegħed jippreżenta sitwazzjoni f’familja ta’ erbgħa min-nies fejn donnu li kulħadd qiegħed jgħix għal rasu, medhi b’dak li l-aktar jinteressah fil-ħajja. Huwa biss Robert, l-iżgħar wieħed, li jinduna, li l-affarijiet m’humiex kif għandhom ikunu u jixtieq li jkun hemm tibdil għall-aħjar. Martina ssib ruħha f’sitwazzjoni skabruża u minn hemm l-affarijiet jieħdu xejra oħra. F’wieħed mill-komponimenti tiegħu, Robert iqanqal tħassib fl-għalliem u issa l-ġenituri tiegħu jsibu ruħhom affaċċjati mir-realtà. Għal aktar tagħrif ikkuntattja lill-Klabb Kotba Maltin fuq 2149 7046 jew ikteb lil charles.casha@gmail.com.

• Memories of Recurrent Echoes. Anton Sammut`s epic novel, a translation of the original in Maltese, Alte Vestiga. The novel is a highly moving story based in Bavaria, Germany, (spreading to Europe) between 1890 and 1990: a hundred years of love, vengeance, tragedy, madness,and all the irreconcilable contradiction of existence which mark out Man`s human nature. It is a physical and spiritual Odyssey, a metaphysical battle between will-power and self-doubt, an exploration of God, human freedom and what is truth. www.recurrentechoes-antonsammut.com

• Diskussjoni dwar iċ-Ċensura organizzata mill-Kunsill Nazzjonali tal-Ktieb, fid-dawl ta’ dak li seħħ f'dawn l-aħħar jiem. Din id-diskussjoni li fiha l-pubbliku jista’ jintervjeni ser issir waqt il-Fiera Nazzjonali tal-Ktieb is-Sibt, 14 ta' Novembru, fis-7.30 p.m. fis-Sala Temi Zammit f’Dar il-Mediterran, il-Belt. Din is-sala tinsab f’nofs is-sala fejn ikunu esebiti l-kotba. Sa issa l-panel huwa magħmul mill-Kittieb Immanuel Mifsud u l-pubblikatur Chris Gruppetta.  

• F'din is-sena se titfakkar t-tmenin sena minn meta l-Profs. P. P. Saydon beda jittaduċi l-Bibbja għall-Malti, u ħamsin sena minn mindu lesta t-traduzzjoni. Għal din ir-raġuni l-Kummissjoni Kultura u Ambjent fi ħdan il-Parroċċa San Ġiljan se tkun qed torganizza taħdita pubblika minn Carmel Bezzina fil-knisja ta' Lapsi (S. Ġiljan, quddiem l-Ambaxxata Ċiniza) nhar il-Ħamis, 19 ta' Novembru, fis-7:15pm. Is-Sur Carmel Bezzina kiteb teżi tal-Masters fuq Profs. Saydon, u fl-2006 ħareġ il-ktieb Saydon: Biblista u Studjuż tal-Malti.

• Il-Fiera Nazzjonali tal-Ktieb, din is-sena ser issir fid-Dar il-Mediterran bejn il-11 u l-15 ta’ Novembru, 2009.  Il-Fiera hija organizzata mill-Kunsill Nazzjonali tal-Ktieb u d-Dipartimenti tal-Libreriji.  Il-fiera toffri opportunitajiet lill-pubbliku biex jiskopri pubblikazzjonijiet ġodda kemm Maltin kif ukoll barranin. Waqt il-Fiera jkun hemm diversi attivitajiet li jiċċelebraw il-kotba.  Il-programm ta’ din is-sena jinkludi:

  L-Erbgħa 11 ta’ Novembru

  19.00: Tnedija tal-ktieb Alla Twajjeb Dejjem. Ġabra ta’ poeżiji ta’ Anton Buttigieg, kompilati minn Anselm Sciberras b’daħla tal-Professur Oliver Friggieri. 

  Il-Ħamis 12 ta’ Novembru

  19.00 Attività divertenti u differenti mill-Merlin Library Ltd bl-isem ta’ tsek-tsik.  10 protagonisti u nofs, 15-il ritratt kull wieħed. 20 sekonda biss fuq kull ritratt.  Protagonisti: Ġuże Stagno, Mona Farrugia, Trevor Zahra, Clare Azzopardi, Robert Cordina, Mario Azzopardi, Pierre Portelli, Chris Gruppetta, Claire Bonello, u Mark Scicluna.

  Il-Ġimgħa 13 ta’ Novembru

  19.00 Trevor Żahra jippreżenta Serata ta’ Letteratura Tikka Mqarba. 

  Is-Sibt 14 ta’ Novembru

  10.00 SKS ser iniedu l-ktieb Pupu fil-Baħar; ġabra ta’ novelli miktuba minn Alfred Sant.

  18.00 Allied Publications ser iniedu Il-Politika tal-Persważjoni; l-awtobijografija tal-Professur Guido de Marco maqluba għall-Malti minn Charles Abela Mizzi.

  Il-Ħadd 15 ta’ Novembru

  17.30 Horizons ser jagħmlu preżentazzjoni ta’ L-Istorja tal-Istorja miktub u moqri minn Ġorġ Peresso. 
   
  L-attivitajiet kollha ser isiru fis-Sala Temi Zammit f’Dar il-Mediterran, u huma mingħajr ħlas u jista’ jattendi għalihom kulħadd.  Xi esebituri ser ikollhom ukoll attivitajiet għaddejjin fuq l-istands tagħhom. Il-Fiera ser tiftaħ kif ġej:

   

  L-Erbgħa 11 ta’ Novembru 9.00 a.m. – 1.30 p.m. 5.00 p.m. – 9.00 p.m.	Il-Ħamis 12 ta’ Novembru 9.00 a.m. – 1.30 p.m. 5.00 p.m. – 9.00 p.m.
  Il-Ġimgħa 13 ta’ Novembru 9.00 a.m. – 1.30 p.m. 5.00 p.m. – 10.00 p.m.	Is-Sibt 14 ta’ Novembru 9.00 a.m. – 12.30 p.m. 4.00 p.m. – 10.00 p.m.
  Il-Ħadd 15 ta’ Novembru 10.00 a.m. – 12.30 p.m. 3.00 p.m. – 9.00 p.m.

   

  Ser ikun hemm it-trasport minn Bieb il-Belt.  Id-dħul għall-Fiera huwa mingħajr ħlas.  Iktar informazzjoni tista’ tinkiseb minn info@ktieb.org.mt jew mill-websajt tal-KNK www.ktieb.org.mt. 

• Tnedija ta' Il-Ġnien tad-Dmugħ ta' Simon Bartolo u Loranne Vella. Club Party. Il-Ġimgħa, 11 ta' Diċembru, fid-9:00pm. Imħażen ta' Caraffa, il-Birgu. I-tielet u l-aħħar volum mit-triloġija tal-Fiddien. Pubblikazzjoni Merlin Library. Party għall-qarrejja tal-Fiddien (+ qraba u ħbieb) minn sittax-il sena 'l fuq. (Il-party għal qarrejja iżgħar se jkun avveniment ieħor.) ILBIES : Kostumi ispirati mit-triloġija tal-Fiddien (min irid). OBBLIGATORJU : Dmugħ Iswed. ATMOSFERA: skura. MUŻIKA: Dj Bob. ILBIES: Mhux tas-soltu. Dħul b'xejn. Waqt il-party se jinbiegħ il-ktieb għall-ewwel darba u se jkunu qed jiffirmawh l-awturi li se jinzlu Malta apposta għal dan l-avveniment

• Il-Ħamis 29 ta' Ottubru, ikun imiss lil Maria Grech Ganado tigi intervistata fil-Kamra tal-Muzika, fil-Kavallier ta' San Gakbu, fis-7,30pm. Din hija t-tieni intervista mis-sensiela *Is-Siegha tal-Kittieba*, sensiela ta' ghaxar intervisti lil kittieba ewlenin. Ghal min ma setax jigi ghall-ewwel intervista ma' Pierre J Mejlak, is-serata tiehu siegha, u fl-ahhar kwarta jkunu l-membri tal-udjenza li jaghmlu l-mistoqsijiet taghhom lill-kittieb/a mistiedna. Maria Grech Ganado hija poetessa li tikteb bil-Malti u bl-Ingliz. Diversi xoghlijiet taghha gew tradotti f'numru ta' ilsna u ppubblikati f'rivisti letterarji rinomati. Ta' spiss tkun mistiedna ghal festivals letterarji. Grech Ganado tat kontribut kbir lil kittieba tal-generazzjoni ta' warajha billi qalbitilhom hafna xoghol ghall-Ingliz. Hija nghatat il-Midalja ghall-Qadi tar-Repubblika bhala gharfien ghall-kontribut letterarju u edukattiv taghha. Maria Grech Ganado se tkun intervistata minn Dr Simone Galea. Fit-12 ta' Novembru jkun imiss lil Albert Marshall li jigi intervistat. Aktar informazzjoni dwar *Is-Siegha tal-Kittieba* tista' tinstab fis-sit elettroniku tac-Centru ghall-Kreattività, www.sjcav.org

• Il-Ħamis fis-7.30pm, fil-Kamra tal-Mużika fil-Kavallier ta’ San Ġakbu, il-Belt Valletta. Sensiela ta' 10 intervisti bl-isem ta' Is-Siegħa tal-Kittieba. Intervisti live ma’ kittieba ewlenin fil-Kavallier ta’ San Ġakbu. Fl-ewwel intervista, Dr. Marco Galea jintervista lil Pierre J. Mejlak ftit wara r-rebħ tal-Premju internazzjonali, A Sea of Words organizzat mill-Fondazzjoni Anna Lindh u IMED. Din is-sensiela, li hija waħda mill-inizjattivi li qegħdin jimmarkaw l-għaxar anniversarju mill-ftuħ taċ-Ċentru tal-Kreattività fil-Kavallier ta’ San Ġakbu, se tlaqqa’ lil dawn l-awturi mal-udjenza u mal-qarrejja tagħhom f’tentattiv li jintwera l-isfond storiku u politiku tal-kitbiet tagħhom. Immexxija minn Marco Galea, Simone Galea u Immanuel Mifsud, dawn l-intervisti live għandhom l-għan li l-kittieba jittrattaw ix-xogħol tagħhom fil-pubbliku. Kull lejla tagħti wkoll l-opportunità lill-membri tal-udjenza li huma wkoll jistaqsu mistoqijiet lill-kittieba.Il-programm tal-intervisti huwa dan:

15 ta’ Ottubru, Pierre J. Meilak

29 ta’ Ottubru, Maria Grech Ganado

12 ta’ Novembru, Albert Marshall

26 ta’ Novembru, Rena Balzan

10 ta’ Diċembru, Clare Azzopardi

7 ta’ Jannar, Oreste Calleja

21 ta’ Jannar, Mario Azzopardi

4 ta’ Frar, Adrian Grima

18 ta’ Frar, Alfred Buttigieg

4 ta’ Marzu, Mario Vella

Id-dħul huwa b’xejn. “Is-Siegħa tal-Kittieba” għandha produzzjoni tal-Kavallier ta’ San Ġakbu u ta’ Immanuel Mifsud. Għal aktar informazzjoni żur is-sit taċ-Ċentru tal-Kreattività www.sjcav.org.

• It-tnedija ta' Lura d-Dar, u Ġrajjiet Oħra Li Ma Ġrawx, novelli ta' Walid Nabhan (Klabb Kotba Maltin, 92 paġna, €7.00) se ssir nhar il-Ħamis, 5 ta' Novembru, fis-7.30pm fis-sala tal-mużika tal-Kavallier ta' San Ġakbu, il-Belt Valletta. Kulħadd mistieden. Walid Nabhan twieled f’Amman il-Ġordan wara li l-ġenituri tiegħu telqu mill-Palestina. Huwa ġie Malta fl-1990 fejn studja t-teknoloġija tal-laboratorji mediċi. Lura d-Dar u ġrajjiet oħra li ma ġrawx huwa l-ewwel pubblikazzjoni tiegħu għalkemm xi wħud mix-xogħlijiet tiegħu dehru f’diversi rivisti u antoloġiji bil-Malti. Dawn l-istejjer ta’ Walid Nabhan mhumiex stejjer li soltu naqraw bil-Malti. Dawn huma stejjer ta’ turufnament fiżiku u materjali. Fin-nofs ta’ dawn l-istejjer insibu dan l-awtur li wasal minn pajjiż ittradut u li baqa’ jgħix b’ħażna ta’ memorji interzjati f’xulxin. Dawn l-istejjer jirrakkontaw l-assurdità donnha inevitabbli tan-natura umani, bl-istaġuni konfużi tagħha, bis-seħer li tnissel fina u l-biża’ li ma jħalliniex norqdu. Għal aktar tagħrif żur is-sit www.midseabooks.com, ikteb lil sales@midseabooks.com, jew ċempel 2149 7046.

• Aġġornament dwar il-Fiera Nazzjonali tal-Ktieb. Ara Folju 88 tal-KNK

• Trevor Żahra jippreżenta Serata ta' Letteratura Tikka-Mqarba nhar il-Ġimgħa, 13 ta' Novembru, fis-7:00pm f'Dar il-Mediterran, il-Belt Valletta, waqt il-Fiera tal-Ktieb.

• Dr. Alfred Sant f'Dissett. Mit-tmexxija għal membru parlamentari komuni, Dr Alfred Sant jitkellem ma` Dissett fuq kif jaħsibha fuq il-ħajja Parlamentari u l-politika. X’ għandu xi jgħid fuq il-Partit Nazzjonalista fil-gvern u kif iħares lejn id-direzzjoni l-ġdida tal-Partit Laburista? U x’ għandu xi jgħid fuq il-kontribut tiegħu fil-letterattura. Għall-ewwel darba fuq it-televizzjoni mindu spiċċa minn mexxej tal-Partit Laburista, Dr Sant jitkellem f’ Dissett. Dissett jixxandar nhar it-Tlieta 20 ta’ Ottubru fuq TVM fl-21.45. Dissett jixxandar ukoll fuq is-sit www.di-ve.com

• Ċeda l-Imbatt - Is-Sibt, 17 ta' Ottubru, 8.00pm, fit-Teatru tal-Università l-Antika, Triq San Kristofru, il-Belt Valletta (MITP). Se tittella' l-produzzjoni teatrali Ċeda l-Imbatt. Dan ix-xogħol oriġinali bil-Malti għandu direzzjoni tal-kittieb u direttur tal-palk, Tyrone Grima. Din il-produzzjoni teatrali tesplora r-rabta bejn il-baħar Mediterran u l-faqar. Il-karattri ta’ dan id-dramm kollha qed jaħbu storja marbuta mal-baħar. U min minnhom qiegħed jgħid is-sewwa? Il-mara Palestinjana (Nadine Genovese) li m’għandhiex ħajta fi lsienha? Is-sid tar-restorant (Marco Calleja) li jagħmel minn kollox, l-aqwa li n-negozju jibqa’ għaddej? Is-sajjied (Mark Schembri) li jaf sew kemm jaf ikun kiefer il-baħar? Sonja (Elaine Falzon) u Pierre (Keith Borg) li spiss jiġġieldu minħabba s-sigrieti li hemm moħbija taħt it-tapit? Jew il-ħlejjaq tal-baħar (Sarah Camilleri u Kurt Castillo) li forsi qed jaraw lenti differenti mill-oħrajn? Permezz tan-narrativa, iż-żfin u l-mużika d-dramm Ċeda l-Imbatt jurina li kull wieħed u waħda minna tista’ jagħmel differenza. Il-produzzjoni hija f'idejn il-kumpannija Theatrencore, u qed tittella' bil-għajnuna ta' STOPoverty, Global Action Schools 2 Communities, Kopin, SKOP, il-Ministeru tal-Affarijiet Barranin, l-Unjoni Ewropea, u Betsson. Id-dħul għal dan ix-xogħol teatrali huwa b'xejn.

• Din is-sena, il-Fiera Nazzjonali tal-Ktieb se ssir Dar il-Mediterran, il-Belt Valletta, bejn il-11-15 ta' Novembru, 2009. Dħul b'xejn. Ara Folju 87 tal-Kunsill Nazzjonali tal-Ktieb b'għadd ta' aħbarijiet.

• Ħareġ Lura d-Dar, u Ġrajjiet Oħra Li Ma Ġrawx, novelli ta' Walid Nabhan, Klabb Kotba Maltin, 92 paġna, €7.00. Walid Nabhan twieled f’Amman il-Ġordan wara li l-ġenituri tiegħu telqu mill-Palestina. Huwa ġie Malta fl-1990 fejn studja t-teknoloġija tal-laboratorji mediċi. Lura d-Dar u ġrajjiet oħra li ma ġrawx huwa l-ewwel pubblikazzjoni tiegħu għalkemm xi wħud mix-xogħlijiet tiegħu dehru f’diversi rivisti u antoloġiji bil-Malti. Dawn l-istejjer ta’ Walid Nabhan mhumiex stejjer li soltu naqraw bil-Malti. Dawn huma stejjer ta’ turufnament fiżiku u materjali. Fin-nofs ta’ dawn l-istejjer insibu dan l-awtur li wasal minn pajjiż ittradut u li baqa’ jgħix b’ħażna ta’ memorji interzjati f’xulxin. Dawn l-istejjer jirrakkontaw l-assurdità donnha inevitabbli tan-natura umani, bl-istaġuni konfużi tagħha, bis-seħer li tnissel fina u l-biża’ li ma jħalliniex norqdu. Għal aktar tagħrif żur is-sit www.midseabooks.com, ikteb lil sales@midseabooks.com, jew ċempel 2149 7046.

• Ħareġ il-ktieb ta' poeżiji tal-poeta Awstraljan-Malti Joe Saliba, Uluru (Melbourne, l-Awstralja: Nimrod Publications, 2009). Dan huwa s-seba’ ġabra ta’ poeziji li ħareġ fil-ħamsin sena li ilu jgħix fl-Awstralja. Dan il-ktieb, imsemmi għall-monolit Awstraljan Uluru (Ayers Rock), jiġbor fih 87 poeżija fuq diversi temi, xi wħud minnhom kontroversjali. It-trattament tas-suġġetti huwa liriku u personali għall-ahhar. Biex tixtri kopja tal-ktieb Uluru ikteb lill-awtur fl-indirizz jpasal@optusnet.com.au. Ara s-sit elettroniku ta' Joe Saliba hawnhekk.

• Lil Hinn mill-Jien u Żewġ huma żewġ pubblikazzjonijiet ta' Alex Vella Gera li ħarġu fl-2009. Lil Hinn Mill-Jien huwa rumanz qasir miktub u ppubblikat minn Alex Vella Gera. Il-ktieb jindirizza tema iebsa, dik ta' familja Maltija moderna fi kriżi, iżda l-awtur jippreżenta s-suġġett tiegħu b'mod oblikwu. Dan huwa leħen ġdid fix-xena letterarja Maltija li mhuwiex neċessarjament marbut mat-tradizzjoni u lanqas ma' mentalità "Maltija". Il-kittieb isegwi l-ħajja separata tal-erba' membri tal-familja, qishom pjaneti qed joħorġu mill-orbita tagħhom madwar xemx tintefa', waqt li jitfa’ l-lenti tiegħu fuq l-irqaqat tal-ħajja mundana ta' kuljum, li tkompli anke fi żmien ta' kriżi.

• Kontra r-rumanz Lil Hinn Mill-Jien, li ġie ppubblikat f’Mejju li għadda, Żewġ (li ħareġ f'Settembru) diffiċli tgħid x’tip ta’ ktieb hu. Fih żewġ novelli, u t-tnejn li huma jistgħu jissejħu fantaxjenza, iżda s-similaritajiet jieqfu hemm. Ara l-promo fuq Youtube hawnhekk. B’Żewġ Vella Gera jistħarreġ l-idea ta’ Malta bħala stat tal-moħħ, billi joħloq fl-istejjer tiegħu gżira nazzjon f’univers parallel li jintgħaraf sew iżda li fl-istess ħin huwa għal kollox aljen. Fi kliem ieħor, dan huwa mod daqsxejn ikkumplikat kif ngħidu li Żewġ għandu jinteressa lil dawk il-qarrejja Maltin li qed ifittxu kitba immaġinattiva/spekulattiva fil-lingwa tagħhom iżda ftit li xejn qed isibuha. Żewġ u Lil Hinn Mill-Jien jinsabu fil-ħwienet tal-kotba u stationers ewlenin; jistgħu jinxtraw direttament minn Sierra Book Distributors fuq 2137 8576 / sales@sierra-books.com. Il-kotba jintbagħtu lil indirizzi lokali mingħajr ħlas żejjed għall-trasport.

• F'Ottubru tħabbar li Pierre J. Mejlak rebaħ il-kompetizzjoni internazzjonali Sea of Words organizzata kull sena minn IE Med u l-Fondazzjoni Anna Lindh biex tippromwovi d-djalogu interkulturali. Ħadu sehem mijiet ta´ kittieba żgħażagħ minn madwar 50 pajjiż Ewropew u Mediterranju, li tniżżlu għal 30. Il-premju tħabbar waqt attività kbira f' Barċellona. Mejlak rebaħ b´vot unanimu tal-ġurija bin-novella "Nixtieq Ngħajjat lil Samirah," li issa ser tiġi ppubblikata mill-organizzaturi tal-kompetizzjoni
  f´għadd ta´ lingwi. Skont Mejlak din hija "Konferma oħra, għal min kien fadallu xi dubju, li l-letteratura Maltija tradotta m´għandha xejn anqas minn letteraturi oħrajn.”

• Antoine Cassar, li s-aena li għaddiet ħareġ il-ktieb Mużajk (Edizzjoni Skarta), għadu kemm rebaħ (Ottubru 2009) il-Grand Prize tal-United Planet Writing Contest 2009 bil-poeżija "Merħba."

• Nota mill-KNK dwar l-ISBN f’Malta. Il-Kunsill Nazzjonali tal-Ktieb jixtieq jinforma lill-pubblikaturi, kittieba, stampaturi, librara, akkademiċi, disinjaturi tal-kotba u entitajiet oħra li l-KNK illum hu r-rappreżentant tal-ISBN f’Malta u ghalhekk dan in-numru jista’ jinkiseb biss mingħandu. Biex tkun ipproċessata talba għan-numru, min hu interessat għandu jibgħat id-dettalji tiegħu (isem, indirizz, eċċ) u t-titlu tal-ktieb, tip ta’ illegar (dan jgħodd speċjalment jekk hemm volum b’qoxra ratba u iebsa) u l-kumplament, flimkien mal-ħlas dovut. Għal iktar tagħrif, u tagħrif dwar il-ħlas dovut, ikteb lill-KNK fuq info@ktieb.org.mt. Minn hawn u ftit ieħor, ir-rati jkunu mniżżla fuq il-websajt tl-Kunsill Nazzjonali tal-Ktieb (www.ktieb.org.mt). (Sergio Grech, Direttur Eżekuttiv, 1 ta’ Ottubru, 2009)

• A Celebration of Languages through Poetry & Music. Peter Wessel and his Polyfonías Poetry Project with Antoine Cassar. Dar l-Ewropa - 254, St Paul’s Street, Valletta on Notte Bianca - Lejl Imdawwal - 3rd October 2009, from 21:00 hrs onwards. Popular music will be played before and after the recital by the Santa Marija Accordion Band www.ec.europa.eu/dgs/translation | www.ec.europa.eu/malta. European Day of Languages 2009

• Nhar il-Gimgha 9 ta' Ottubru 2009 fis-7.00pm. L-Għaqda Filantropika Talent Mosti tippreżenta żewġ drammi qosra għall-gosti ta' kulħadd, Mistura tal-Imħabba għal Arlekkin ta' Narcy Calamatta u Kollox bil-Qaddisin ta' Frank Tanti msejjes fuq l-istejjer ta' Dun Xand Cortis.

• Nhar il-Ħamis 22 ta' Ottubru 2009 fis-7.00pm. L-Ghaqda Filantropika Talent Mosti bi pjaċir tistiednek għal tahdita "Niltaqghu mal-Awtur" fir-Razzett tal-Markiż Mallia Tabone. Ix-Xandar Charles Abela Mizzi se jintervista lil Dr. Alfred Sant dwar ir-rumanz il-ġdid tiegħu L-Għalqa tal-Iskarjota. Kulħadd huwa mistieden jattendi. Dħul bla ħlas.

• Programmi fuq ir-radju. It-Tnejn fid-9.30am u l-Erbgħa fis-1.30pm fuq Campus FM: IL-KTIEB L-IEĦOR, programm bil-kulur għar-radju. Qari ta' rumanz (META L-ĦARIFA TISKOT) b'mod viżiv għar-radju. Preżentazzjoni u produzzjoni Ġorġ Peresso u Celaine Buhagiar. Fuq Radju Malta, NAQRA, NITFA TIKKA GĦALL-ĦARIFA nhar ta' Sibt fil-12.15.
  Fuq Radju Malta, QARI BIL-MALTI nhar ta' Tlieta u nhar ta' Ħamis. Bħalissa Ġorġ Peresso qed jaqra GĦADA JISBAĦ UKOLL.

• Premju Nazzjonali tal-Ktieb 2009 għall-kotba li ħarġu fl-2008 Ara Folju 86 tal-KNK

• Spazju għall-Awturi waqt il-Fiera Nazzjonali tal-Ktieb 2009 Din is-sena waqt il-Fiera Nazzjonali tal-Ktieb, li se ssir f’Dar il-Mediterran il-Belt f’Novembru 2009, nixtiequ nagħtu spazju lil Awturi individwali biex jippreżentaw serata bix-xogħlijiet tagħhom. Nixtiequ li l-preżentazzjoni tax-xogħol tkun madwar tema partikolari - forsi tkun tema ta’ kontenut jew stil rikorrenti fix-xogħol tagħhom. Għal dan il-għan, il-Kunsill Nazzjonali tal-Ktieb qed jistieden lill-awturi interessati biex jissottomettu proposta. L-attivitajiet isiru fis-Sala Temi Zammit. Il-KNK min-naħa tiegħu se jipprovdi biss l-ispazju. Kull spejjeż oħra (kull m’għandu x’jaqsam malpreżentazzjoni, ħruġ ta’ inviti, eċċ) irid jidħol għalihom l-awtur. Is-sala toffri wkoll il-ħwejjeġ bażiċi li jkollu bżonn kulmin jippreżenta attivitaijiet bħal dawn. Bżonnijiet li ma tkoprihomx id-direzzjoni, jitħallsu mill-awtur. Il-KNK jixtieq javża li kull proposta se tkun evalwata u wieħed jifhem li minħabba attivitajiet oħra li jkun hemm għaddejjin, bħal tnedijiet ta’ kotba, ma nkunux f’pożizzjoni li nilqgħu kull idea li titressaq. Għalhekk hu importanti li min hu interessat javżana kmieni. Ġaladarba l-proġett ikun milqugħ, l-awtur u l-KNK jidħlu fi ftehim rigward organizazzjoni u l-kumplament. Id-deċiżjonijiet tal-KNK dwar danhija finali, u jżomm id-dritt li jirrifjuta kull talba mingħajr spjegazzjoni.

• Ir-raba' edizzjoni tal-Festival Mediterranju tal-Letteratura ta' Malta, il-Ħamis 10, il-Ġimgħa 11 u s-Sibt, 12 ta' Settembru, fit-8.00pm, fil-Kavallier ta' San Ġwann, il-Birgu (ħdejn Couvre Porte). Jieħdu sehem Fatena Alghorra (Gaża, il-Palestina), Norbert Bugeja (Malta), Mohammed El Amraoui (Franza), Mimmo Grasso (l-Italja), Daniel Jonas (il-Portugall), Daniel Massa (Malta), Marta Pessarodona (il-Katalonja, Spanja) u Alex Vella Gera (Malta). Il-mużiċisti mistiedna huma Renzo Spiteri (perkussjoni) u Jes Psaila (kitarra). Dħul b'xejn. Organizzat minn Inizjamed u Literature Across Frontiers bl-għajnuna tal-Kunsill Malti għall-Kultura u l-Arti, il-Fondazzjoni René Seydoux u l-Institut Ramon Llull. Literature Across Frontiers huwa proġett Ewropew b'finanzjament mill-programm Kultura tal-UE. Ara www.inizjamed.org

• Pubblikazzjoni bil-Malti daqsxejn mhux tas-soltu: KOMIKS TAS-SIKKINA, sensiela ta' stejjer bl-istampi, daqsxejn spiritużi u mqarbin, maħsuba għal dawk ta' 'l fuq minn sittax-il sena. Jinbiegħu minn għand l-Agenda tal-Università u l-Agenda tal-Belt, m'għand Palmyra ta' B'kara, Velmor tar-Raħal il-Ġdid, il-Malta Comics ta' Tas-Sliema, St. Anne's Emporium tal-Furjana, u AwTribu tal-Fgura. Tistgħu wkoll iżżuru s-sit elettroniku http://komikstassikkina.page.tl

• POEŻIJAPLUS, it-Tnejn, 31 ta' Awwissu, 7.30pm. Kunċert tal-Kawtawtriċi fil-bitħa tat-Teatru Manoel. Jieħdu sehem Corazon Mizzi, Lara Vassallo, Fiona, Dana McKeon, Chery (Instincts), u Marie Therese Vassallo. Dħul b'xejn.

• Id-Djaletti Festival f'Ghawdex. VersAgħtini Il-Kelma Maltija qed jorganizza Festival tad-Djaletti fil-Mużew tal-Folklor l-Għarb, Għawdex, nhar il-Ħadd, 6 ta' Settembru, 2009 fil-11:00am. Jiftħu l-attività l-awtur Ġużi Gatt li se jitkellem bid-djalett Żejtuni, waqt li Victor Galea se jitkellem bil-Brejku. Jieħdu sehem għannejja Għawdxin. Kulħadd mistieden. Dħul b'xejn. Għal aktar tagħrif ċemplu 2166 7001 jew 9922 6186 jew 7901 7017 (Miriam Cassar)

• Malta University Publishing għadha kemm ippubblikat Glossarju Franċiż-Malti/Malti-Franċiż li miġbur minn Toni Aquilina flimkien ma' Celine McCarthy. IISBN: 978-99909-44-43-3.

• Sergio Grech għadu kemm nieda l-blogg tiegħu dwar dwar dak li qed jiġri fid-dinja tal-ktieb lokali u internazzjonali, http://ktieb.wordpress.com. L-informazzjoni ser tittella’ f’diversi ħinijiet tal-ġurnata. Barra tagħrif dwar pubblikazzjonijiet ġodda u attivitajiet relatati, il-blogg se jkun fih ukoll kummenti mill-kittieba u l-pubblikaturi dwar id-dinja tal-ktieb.

• Għeziez ħbieb, Nixtieq nistieden lil dawk kollha li wegħduna xi donazzjonijiet ta' kotba għall-Kampanja Ktieb Kafè biex iħallu l-kotba fil-Librerija Pubblika Ċentrali tal-Furjana jekk jista' jkun sal-aħħar ta' Lulju. Il-ħinijiet tal-ftuħ huma: mit-8.30 am sa 12.45 pm. Min-numru ta' kotba jiddependi n-numru ta' postijiet li jkunu jistgħu jipparteċipaw fil-kampanja. Nixtieq infakkarkom li qed jiġu aċċettati kotba ta' kull tip, għal kull età, bil-Malti jew bl-Ingliż. Nirringrazzjakom bil-quddiem. (Nadia Mifsud)

• Fond għall-Arti. Nhar il-Ġimgħa 7 ta’ Awwissu, 2009, il-Ministru tal-Edukazzjoni Dolores Cristina u l-Ministru tal-Finanzi l-Onor. Tonio Fenech nidew il-Fond għall-Arti. Iktar minn 300,000 ewro ser ikunu disponibbli għall-artisti Maltin. Bla dubju, ta’ xejn fond bħal dan għandu jgħin biex il-kreattività f’pajjiżna timxi ‘l quddiem. Pajjiżna jbaqbaq bil-kultura
  sinjura u l-artist Malti għandu prodott validu. Il-kittieba wkoll jistgħu jgawdu minn dan il-fond. Sergio Grech attenda f’isem il-KNK għal din l-attività.Iktar tagħrif dwar il-fond jista’ jinkiseb minn: www.education.gov.mt/artsfund.htm.

• Ara Numru 84 tal-Folju tal-Kunsill Nazzjonali tal-Ktieb, Awwissu 2009.

• Il-Premju Nazzjonali tal-Ktieb (għall-2008). Il-Kunsill Nazzjonali tal-Ktieb jgħarraf li, permezz ta’ premjijiet u għotjiet, se jingħata għarfien lill-awturi ta’ l-aħjar xogħlijiet letterarji u ta’ xejra oħra bil-Malti u b’lingwa oħra li ġew ippubblikati għall-ewwel darba fi ktieb matul is-sena 2008. Il-parteċipanti għandhom jibagħtu erba’ kopji tal-ktieb (li ma jintraddux lura) lis-Segretarju, Librerija Pubblika Ċentrali mhux aktar tard minn nofsinhar is-Sibt, 8 ta’ Awissu, 2009. Ara r-Regolamenti. Niżżel il-formola għall-Premju tal-Ktieb. Ara wkoll il-Formola għar-Rikonoxximent tal-Ħidma tul il-ħajja ta’ persuna li tat kontribut siewi fil-letteratura jew fil-qasam tal-ktieb

• Prezzijiet speċjali fuq kotba tal-kbar das-sajf mill-Wise Owl Publications. Paperbacks kollha €2. Triq il-Kbira, ir-Rabat: 9.30am – 12.30pm u 4.30pm – 7.00pm; Triq Zakkarija, il-Belt Valletta: 9.30am – 2.00pm; Is-Sibt: 9.30am – 12.30pm

• Kahlil Gibran fit-Teatru Manoel. Poeżijaplus u l-Klabb Kotba Maltin nhar it-Tnejn, 29 ta’ Ġunju, 2009 fil-Bitħa tat-Teatru Manoel fis-7.30 p.m. ser jippreżentaw Il-Profeta ta’ Kahlil Gibran bil-Malti. Matul il-Fiera tal-Ktieb tas-sena 2008, il-Klabb Kotba Maltin ippreżentaw il-verżjoni Maltija ta’ Il-Profeta maqluba għall-Malti minn Victor Fenech; wieħed mill-poeti ewlenin tagħna. Din l-attività għandha direzzjoni artistika ta’ Tony Cassar Darien. Jieħdu sehem l-atturi Anthony Ellul u Kathleen Mamo. Id-dħul hu mingħajr ħlas. Iktar tagħrif jista’ jinkiseb minn www.poezijaplus.com jew sergiogrech@yahoo.com Sergio Grech 99827179.

• Ippubblikat id-Dictionary of Maltese Biographies u aħbarijiet oħrajn mill-Kunsill Nazzjonali tal-Ktieb. Ara dan il-Folju tal-Aħbarijiet

• VersAgħtini IL-KELMA MALTIJA u l-Għaqda Filantropika Talent Mosti jippreżentaw il-festival Insellmu lil Frans Baldacchino, ‘il-Budaj’ bid-Djaletti Tagħna. Il-Ħadd 21 ta’ Ġunju, 2009, fir-Razzett tal-Markiż Mallia Tabone, il-Mosta, bejn is-7.00pm u d-9.00pm. Mistidnin Speċjali: Is-sinjura Pawla Baldacchino, il-kitarrist Salvu Tanti u
  l-kantawtur Mario Debono. Kulħadd mistieden. Dħul b’xejn. Aktar tagħrif 2166 7001 jew 9922 6186. Attività oħra b’risq l-Ilsien Malti minn VersAgħtini IKMVO50

• Għall-kittieba ta' kull età - Konkors ta' Kitba "Letteratura għaż-Żgħażagħ" organizzat mis-Segretarjat Parlamentari għaż-Żgħażagħ u Sport, u l-Kunsill Nazzjonali tal-Ktieb. Is-Segretarjat Parlamentari għaż-Żgħażagħ u Sport flimkien mal-Kunsill Nazzjonali tal-Ktieb qed iniedu l-Konkors “Letteratura għaż-Żgħażagħ” biex jixprunaw il-letteratura Maltija maħsuba għall-età tal-adolexxenza. Fil-11 ta’ Novembru 2009 jingħalqu s-sottomissjonijiet. Dan il-konkors huwa miftuħ biss għal manuskritti li jitrattaw l-età tal-adolexxenza, li jfisser żgħażagħ ta’ bejn 12 u 17-il sena. Ix-xogħol irid ikun bil-lingwa Maltija. Ix-xogħol irid ikun oriġinali u qatt ma deher ippubblikat, la sħiħ u lanqas xi partijiet minnu. Il-manuskritt m’għandux inkun inqas minn 20,000 kelma u m’għandux jaqbeż il-25,000 kelma. Kull kompetitur jista’ jissottometti sa tliet manuskritti, iżda ma jistax jirbaħ aktar minn premju wieħed. L-awtur tal-manuskritt għandu juża nome de plume. F’envelowp separat u ssiġillat, l-awtur jagħti dawn id-dettalji: isem, età, indirizz, numru tal-mowbajl, numru tat-telefown u indirizz elettroniku (email). Għandu jkun hemm ukoll dikjarazzjoni li dan hu xogħol oriġinali, li qatt ma ġie ppubblikat qabel jew xi partijiet minnu u li qatt ma tah lil xi pubblikatur. Il-manuskritti għandhom jaslu għand is-Segretarju tal-Kunsill Nazzjonali tal-Ktieb, Librerija Pubblika Centrali sal-11 ta’ Novembru 2009. Ara r-Regolamenti għall-Kittieba (Word). Ara l-verżjoni pdf

• Jitnieda l-Konkors “Letteratura għaż-Żgħażagħ” mill-Kunsill Nazzjonali tal-Ktieb (Ġunju 2009). Ara wkoll aħbarijiet oħrajn mill-Kunsill tal-Ktieb fil-Folju 78.

• Klabb Sajf. Avventura ta’ kitba u kreattività. Il-Fondazzjoni għal Servizzi Edukattivi ser toffri l-programm edukattiv Klabb Sajf għat-tfal minn Year 3 sa Form 3. Dan il-klabb ser ilaqqa’ l-kreattività u l-gost flimkien mal-kitba f’atmosfera ta’ klabb sajfi. Il-parteċipanti ser ikunu jistgħu jieħdu sehem f’attivitajiet bħal tpinġija, crafts u ħruġ f’postijiet ta’ interess li jnibbtu fihom l-għatx għall-kitba. Fl-aħħar tal-klabb ser ikun hemm ċelebrazzjoni, fejn il-parteċipanti jaqsmu l-esperjenza tal-klabb mal-ġenituri tagħhom u mistiedna oħra. Kull min jattendi regolarment jingħata Ċertifikat ta’ Parteċipazzjoni. Dawk li jixtiequ jipparteċipaw jeħtieġu jkunu jafu jitkellmu u jiktbu b’Malti u b’Ingliż ta’ livell addattat għall-età tagħhom. Il-klabb ser ikun immexxi minn tutors imħarrġa fil-proċess tal-kitba. L-applikazzjonijiet jintlaqgħu sa nhar il-Ħamis 18 ta’ Ġunju 2009. Għal aktar informazzjoni ċemplu fuq 21 455600 / 21 455 607 ext 124 u staqsu għal Ms Muriel Grech. mwp.fes@gov.mt - www.fes.org.mt

• 27-30 ta' Mejju. L-attività li jmiss fil-kalendarju tal-Kunsill Nazzjonali tal-Ktieb hi t-tieni edizzjoni tal-Fiera tal-Ktieb Malti. Din is-sena l-Fiera tal-Ktieb Malti ser issir mill-Erbgħa 27 sad-29 ta' Mejju 2009 mill-10.00 sad-19.00 u s-Sibt 30 ta Mejju 2009 mid-9.00 sas-13.00. Din is-sena l-Fiera tal-Ktieb Malti ser issir fis-Segretarjat Parlamentari għat-Turiżmu li jinsab fil-Berġa tal-Italja, Triq il-Merkanti, Valletta. Bi ktieb Malti qed nifhmu ktieb ippubblikat Malta. Illum il-prodott kiber ħafna kemm dik li hi produzzjoni kif ukoll fil-kontenut. Fil-Fiera ser jieħdu sehem Klabb Kotba Maltin, Midsea Books, Merlin Library Ltd, Wiseowl Publications, Franny Jo Publications, PIN u Uptrend Publishing. Id-dħul għall-Fiera bħal kull attività oħra organizzata mill-Kunsill Nazzjonali tal-Ktieb hu mingħajr ħlas. www.ktieb.org.mt Ara l-folju dwar din il-Fiera

• L-Għalqa tal-Iskarjota, rumanz ġdid ta' Alfred Sant ippubblikat mill-PEG se jkun għall-bejgħ mill-Erbgħa, 27 ta' Mejju, 2009. Ibagħtu ċekk ta' €12 lil Malta Book Network (MBN), UB7, Industrial Estate, San Ġwann, SGN3000. Il-ktieb jitwasslilkom id-dar mingħajr spejjeż żejda. Inkella tistgħu tixtru l-ktieb mill-ħwienet ewlenin jew direttament mingħand il-MBN.

• Folju tal-Aħbarijiet 158, Mejju 2009, tal-Grupp Letteratura Maltija ta' Victoria, l-Awstralja.

• B’talba ġenerali Klabb Kotba Maltin għadu kemm ippubblika edizzjoni ġdida tal-ktieb Fjuri li ma Jinxfux, volum ta’ memorji ta’ Oliver Friggieri. Il-ktieb qajjem interess kbir fost qarrejja ta’ ġenerazzjonijiet differenti minn mindu ħareġ ftit xhur ilu.
     Fjuri li ma Jinxfux huwa ktieb ta’ memorji tas-snin 1955-1990, u jiġbor esperjenzi personali u familjari, kif ukoll l-esperjenza politika Maltija, l-aktar il-konflitt bejn il-Partit Nazzjonalista mmexxi minn Ġorġ Borg Olivier u Eddie Fenech Adami, u l-Partit Laburista mmexxi minn Dom Mintoff u Karmenu Mifsud Bonnici. Oliver Friggieri jirrakkonta l-memorji tiegħu tas-snin ħamsin u sittin, il-kwistjoni politika-reliġjuża li kienet konfront bejn l-Arċisqof Gonzi u l-Perit Mintoff, iċ-ċentinarju ta’ San Pawl fl-1960, l-Interdett, is-snin tiegħu fis-Seminarju f’dan l-istess żmien, l-ewwel laqgħa tiegħu mal-Arċisqof Gonzi, it-trobbija fil-Museum. Imbagħad il-ktieb jgħaddi għas-sebgħinijiet, li fetħu bl-elezzjoni li wasslet lil Mintoff fil-Gvern fl-1971. ‘Fjuri li ma Jinxfux’  jirrakkonta epoka sħiħa mill-aspett personali u politiku, u fih  ukoll ħafna ritratti li qatt ma ġew ippubblikati qabel.
     Il-ktieb huwa mimli kwadri kurjużi miż-żmien tat-tfulija tal-awtur fl-inħawi tal-Furjana, tal-Belt Valletta u tal-Port il-Kbir, u jinkludi ħafna drawwiet u affarijiet oħra li llum spiċċaw. Fih ħafna dettalji li llum bdew jintesew imma li kienu importanti għal nies ta’ ċerta età. Il-ktieb jirrakkonta wkoll il-ġlieda bejn il-Knisja Kattolika u l-Partit Laburista, kif għexha l-awtur stess bħala tifel fil-Museum u mbagħad Seminarista. Oliver Friggieri jirrakkonta fid-dettal anki l-perijodu tas-snin sebgħin u tmenin fi żmien il-Gvern ta’ Mintoff, u kif f’dan iż-żmien tfaċċat il-figura differenti ta’ Eddie Fenech Adami u dak kollu li hu għadda minnu sakemm iddomina x-xena u sar Prim Ministru. Huwa jirrakkonta wkoll kif żmien twil wara huwa stess iddiskuta fil-privat din is-sitwazzjoni diffiċli ma’ Mintoff, u kif kien Mintoff stess li b’diskors li kien għamel kien wasslu biex kiteb ir-rumanz Fil-Parlament ma Jikbrux Fjuri fl-1986. Fjuri li ma Jinxfux jinkludi deskrizzjoni twila ta’ kif hu kien iddiskuta kollox ma’ Mintoff.
     Minbarra deskrizzjonijiet twal u dettaljati tal-ħajja popolari tas-snin ħamsin u sittin, Fjuri li ma Jinxfux jinkludi deskrizzjonijiet ta’ kif l-awtur kien jaf lil Ġorġ Borg Olivier, Eddie Fenech Adami, Ċensu Tabone, Guido de Marco, Ugo Mifsud Bonnici u Alfred Sant. Fil-kaz ta’ Alfred Sant l-awtur imur lura sas-snin sittin u l-ambjent ta’ Pjazza Reġina u Strada Rjali. L-ambjent tal-ħajja Maltija ta’ fil-familja u fil-parroċċa huwa deskritti fid-dettal, u b’mod partikolari Balzunetta fejn l-awtur trabba għal ħafna snin.
     Fjuri li ma Jinxfux jagħti importanza kbira lill-ħajja politika ta’ Malta tas-snin sebgħin u tmenin, u juri għala l-Maltin, qabel u wara l-Indipendenza tal-1964 kienu kapaċi jevitaw traġedja nazzjonali bħalma hi gwerra ċivili. Diversi avvenimenti politiċi huma interpretati bħala x-xifer ta’ konfront ċivili li spiċċa biex ma sarx.        
      Oliver Friggieri għamel dan il-kumment: “Il-ktieb ‘Fjuri li ma Jinxfux’ huwa rakkont  dwar żewġ affarijiet: il-ħajja komuni u sempliċi tal-familja li setgħet  tgħix b’nofs  lira kuljum, u l-ħajja mqallba u perikoluża tal-poplu Malti maqsum fi tnejn, fuq ix-xifer ta’ gwerra ċivili. B’dan il-ktieb, fost l-oħrajn, nixtieq nifraħ lill-poplu Malti li rnexxielu jevita l-inkwiet li pajjiżi oħra, ex-kolonji, ma rnexxilhomx jevitaw.”
      Fjuri li ma Jinxfux, volum ta’ seba’ mitt paġna, jinsab għall-bejgħ għand il-Klabb Kotba Maltin, Santa Venera, u l-librara ewlenin f’Malta u f’Għawdex.

• Michel. Xogħol oriġinali bil-Malti, kitba u direzzjoni ta’ Tyrone Grima. Il-kast ilaqqa’ bosta atturi b’esperjenza differenti. Insibu lil Stefan Farrugia, Keith Borg u Tony Ellul fil-partijiet prinċipali. Jieħdu sehem ukoll Mireille Mifsud, Elaine Falzon, Claire Bonello, Nadine Genovese u Dorianne Bonanno fost oħrajn. ‘Michel’ bi produzzjoni ta’ Theatrencore, se tittella’ l-MITP bejn is-17 u d-19 ta’ April, il-biljetti jistgħu jinxtraw mill-Kavallier ta’ San Ġakbu, 21223216 jew boxoffice@sjcav.org.
  F’dan ix-xogħol teatrali oriġinali, Tyrone Grima jifli bir-reqqa aspetti differenti mill-ħajja tassew interessanti tal-kittieb Franċiż Michel Montaigne. Huwa kien politiku, kittieb, viżjonarju iżda wkoll raġel tal-familja u fuq kollox bniedem bħal kulħadd, bix-xewqat u l-ħsibijiet li għandu kull wieħed u waħda minna. Ix-xogħlijiet tiegħu bħal ‘De l’amitié/On friendship’ kif ukoll il-bijografija ta’ dan l-awtur rinaxximentali kienu ta’ spunt għal Grima sabiex joħloq storja fi sfond kontemporanju li tqanqal il-ħsieb u domandi dwar kunċetti ta’ kull żmien.
  Kollox ikun miexi ħarir għal Michel; is-suċċess fil-ħajja politika qiegħed dejjem jiżdied, il-preżenza ta’ nies li jixtiqulu l-ġid timlieh bil-kuraġġ, il-ħbiberija tiegħu ma’ Etienne de La Boétie tgħinu jimxu dejjem aktar ‘il quddiem. Iżda Michel iżomm fih bosta sentimenti li jġiegħluh ikun xettiku u li b’hekk jibda jistaqsi dwar l-eżistenza tiegħu. Dawn il-mistoqsijiet juru li Michel għandu karattru ferm aktar profond milli wieħed jaħseb u li fih iżomm bosta ħsibijiet, esperjenzi, sfidi u fl-aħħarnett il-ħolma tiegħu. Iżda kemm u kif se ssir possibbli din il-ħolma? Naraw li l-ħbiberija ma’ Etienne issir għal Michel importanti ħafna, forsi xi ftit iżżejjed, tant li jasal biex iwarrab minn ħajtu nies bħal mara tiegħu Francesca u l-assistent tiegħu Raymond.
  Huwa permezz tal-karattri, tax-xeni, tal-mużika u tal-kitba retrospettiva, li l-udjenza, flimkien mal-karattri tal-istorja, tibda triqitha bil-mod il-mod lejn l-iskoperta tal-verità dwar il-kitba ta’ dan ir-raġel u dwar ħsibijietu li matul iż-żminijiet influwenzaw bosta nies differenti. Fil-fatt it-tieni att huwa rifless litterarju tal-ewwel att, fejn niskopru ftit ftit il-verità dwar l-ħbiberija bejn Michel u Etienne.

• Ħarġet iċ-ċirkulari ta' April 2009 tal-Akkademja tal-Malti. www.akkademjatalmalti.com

• Is-Sibt, 18 ta’ April 2009 mill-10:00 sal-11:00 u l-Ħadd, 19 ta’ April 2009 mill-10:00 sal-11.00. Żewġ seminars mill-Akkademja tal-Malti u Palazzo Falson fl-okkażjoni tal-Festival Medjevali fl-Imdina, bis-sehem ta’ Prof. Godfrey Wettinger, Prof. Manwel Mifsud, Prof. Stanley Fiorini, Dr Martin Zammit, u b’daħla mis-Sur Toni Cortis. Dħul: l-attendenza għas-seminar hija b’xejn imma naċċettaw l-ewwel 30 persuna li japplikaw (bookings@palazzofalson.com tel: 2145 4512). Kull min jixtieq iżur il-bqija tal-Mużew Palazzo Falson huwa intitolat għal skont ta’ 50% matul il-Festival Medjevali.

• VersAgħtini IL-KELMA MALTIJA, flimkien mal-Għaqda Filantropika Talent Mosti, jistidnuk għall-festival, ID-DJALETTI TAGĦNA. "Il-Festa ta' Dari u tal-Lum." Nhar l-Erbgħa, 22 ta' April, 2009, fir-Razzett tal-Markiż Mallia Tabone, il-Mosta, fis-7.00pm. Kulħadd mistieden. Dħul b'xejn. Diġà kkonfermaw li se jieħdu sehem persuni li se jitkellmu bid-DJALETT Għargħuri, Għaxqi, Karkariż, Mellieħi, Mosti, Żejtuni, Żurrieqi u Xlukkajr, fost oħrajn. Għal aktar tagħrif ċempel: 2166 7001 jew 9922 6186.

• Jum il-Ktieb 2009 - Attivitajiet fil-Kavallier ta’ San Ġakbu l-Belt. Ara l-programm sħiħ

  22 ta’ April 2009

  19.00 Ġuże u ż-Żerbinotti: L-awtur Ġuże Stagno intervistat minn Julia Farrugia.

  23 ta’ April 2009

  18.00  MALIA - Il-Gost tal-Ktieb bis-sehem ta’ Joseph Mizzi, Immanuel Mifsud u Peppi Azzopardi.  

  19.30 Iltaqa’ mal-Pubblikatur:  Alfred Buttigieg u Joseph Mizzi             

  25 ta’ April 2009 - 10.15 Clare Azzopardi tniedi  r-rumanz għat-tfal Il-Każ kważi kollu tal-Aħwa De Molizz

  19.30 Letteratura Mqarba bis-sehem ta' Clare Azzopardi, Adrian Grima, Mario Azzopardi, Immanuel  Mifsud, Maria Grech Ganado, Ġużè Stagno, Trevor Zahra, Terence Portelli u bosta oħrajn.

  26 ta’ April 2009

  10.00 Il-Ħadd ma’ Trevor Żahra  

  14.30 Rita Saliba taqra l-kitbiet tagħha għat-tfal

  15.00 Charles Casha u Fra Mudest

  15.30 Marika Azzopardi taqra mill-ktieb Mhux Tort Tiegħi

  16.00 Charles Azzopardi jitkellem dwar il-kotba tiegħu dwar is-separazzjoni fil-familja.  

  18.00 L-Awtobijografiji President Emeritus Guido De Marco, Lino Spiteri, il-Maġġur Stanley Clews

  19.30 Għeluq tal-Ġimgħa tal-Ktieb: Serata ma’ Joe Friggieri

• Ġużè Stagno intervistat minn Julia Farrugia. L-attivitajiet għall-adulti tal-Kunsill Nazzjonali tal-Ktieb għal Jum il-Ktieb 2009 jiftħu l-Erbgħa 22 ta’ April fis-7 pm fil-Kavallier ta’ San Ġakbu b’intervista ta’ Julia Farrugia lill-kittieb Ġużè Stagno. Stagno huwa l-awtur tar-rumanzi Nbid ta’ Kuljum, Xemx Wisq Sabiħa u Ramon u ż-Zerbinotti. L-istil ta’ Stagno sab kemm barka kif ukoll saħta. B’Inbid ta’ Kuljum Stagno irnexxielu jirbaħ il-premju tal-MAPA u spiċċa fit-tieni post fil-Premju Letterarju.  B’Xemx Wisq Sabiħa kiseb it-tieni post fil-Premju Letterarju. 

  Julia Farrugia hija magħrufa fil-qasam tal-ġurnaliżmu investigattiv. Għandha 31 sena u hi ġurnalista mal-gazzetta Illum.  Fil-karriera tagħha misset bosta suġġetti skabrużi. Rebħet għadd ta’ premjijiet, fosthom dak tal-EU ‘For Diversity. Against Discrimination’ Special Award (2008) b’servizz dwar ir-Roma tal-Ungerija. Dan il-premju rebħitu wkoll fl-2007. Fl-2007 rebħet il-premju mogħti minn Din l-Art Ħelwa Cultural Heritage Journalist Awards. Il-ġurnalista qed tagħti l-opportunità biex il-fans ta’ Stagno jibagħtu l-mistoqsijiet tagħhom fuq il-Facebook tagħha. Matul l-attivitajiet ser ikun hemm ukoll bejgħ ta’ kotba mill-Klabb Kotba Maltin, Franny Jo Publications, Uptrend Publishing u Wiseowl Publications. L-attivitajiet kollha huma mingħajr ħlas u l-pubbliku huwa mistieden u mħeġġeġ li jattendi. 

• Biblijoskene, nhar it-23 u l-24 ta’ April fis-7 p.m. fiċ-Ċentru tad-Drama, Blata l-Bajda, u mtellgħa bi sħab mal-Kunsill Nazzjonali tal-Ktieb għall-Jum Dinji tal-Ktieb. Proġett teatrali ta' Albert Marshall li ser jippreżenta collage ta’ poeżiji ta’ poeti li welldu l-Moviment  Qamien Letterarju u poeti kontemporanji. L-atturi li ser jieħdu sehem f’din il-biċċa xogħol huma Yvette Buhagiar, Aaron Grech, Tony Ellul, Olivia-Ann Marmarà u Jane Marshall.  Lara Vassallo ser tieħu ħsieb il-kant. Dħul mingħajr ħlas. Dawk li jixtiequ jattendu għandhom jibagħtu e-mail lil info@ktieb.org.mt u jgħarrfu meta jixtiequ jattendu. Fadal biss ftit postijiet. Mario Azzopardi u Sergio Grech qed jikkordinaw dan il-proġett.

• Fost l-attivitajiet ta' Jum il-Ktieb ikkoordinati mill-Kunsill Nazzjonali tal-Ktieb se ssir rappreżentazzjoni mtella’ miċ-Ċentru tad-Drama b’direzzjoni ta’ Albert Marshall fit-23 u l-24 ta’ April, 2009 bl-isem ta' Collage Poezija. Qed nistednukom biex tgħarrfuna meta minn dawn id-dati tistgħu tattendu u kemm tixtiequ postijiet biex jinħareġ l-invit. Ma jistgħux jintrefgħu iktar minn żewġ postijiet għal kull individwu. Hu importanti li min jgħid li ġej jiġi għax din l-attività hi għal udjenza ristretta minħabba l-ispazju. Id-dħul huwa mingħajr Ħlas. Grazzi tal-koperazzjoni tagħkom u tislijiet mill-qalb. Nieħdu gost li tilqgħu l-istedina tagħna. (Sergio Grech, Direttur Ezekuttiv, Kunsill Nazzjonali tal-Ktieb)

• Proposta ta’ Liġi mill-Kunsill Nazzjonali tal-Ktieb - www.ktieb.org.mt Il-Kunsill Nazzjonali tal-Ktieb qed jipproponi li l-Parlament Malti jikkunsidra li fil-Liġi Maltija jkun
  hemm Att dwar il-Ktieb Malti biex b’hekk dan is-settur jissaħħaħ. Il-prinċipji li qed ikunu proposti huma fundamentali għall-ħarsien u l-promozzjoni tal-Ktieb Malti, it-twaqqif tal-Kunsill Nazzjonali tal-Ktieb, blintenzjoni li tkun il-mira tal-Istat li japplikahom u jimxi fuqhom. Ara l-istqarrija tal-Kunsill.

• Il-KNK flimkien mal-Kavallier ta' San Gakbu qed iħejji erbat ijiem ta' celebrazzjoni għal Jum il-Ktieb 2009 bejn it-22 u s-26 ta' April. L-idea hi li jkollna laqgħat ma' awturi, tnedijiet ta' kotba, lectures, rakkontar ta' stejjer, u l-kumplament. Ser ikun hemm il-bejgħ tal-kotba wkoll. Napprezza ħafna jekk tesprimi l-interess tiegħek f'dawn l-attivitajiet u tavżani meta ma tkunx tista' biex jitħejja programm. Is-Sibt 25 mhux ser ikun hemm attivitajiet. Napprezza jekk tinfurmaw lil dawk li taħsbu li jkunu interessati. (Sergio Grech)

• Nhar il-Ħamis, 2 ta’ April fis-6.00 pm, fl-Aula Magna tal-Università l-Qadima, il-Belt Valletta. PUBLISHING TODAY AND TOMORROW. Taħdita pubblika minn MR ANGUS PHILLIPS, Direttur tal-International Centre for Publishing Studies, Oxford Brookes University. It-taħdita hija organizzata mid-Dipartiment tal-Ingliż u l-Fakultà tal-Arti tal-Università ta’ Malta u se tkun bl-Ingliż.

• GĦALIEX SUR FONS? Produzzjoni teatrali ispirata mill-figura ta' Alfons Maria Galea, b'kitba u direzzjoni ta' Lino Ferris se tittella' minn Atturi Salesjani fit-Teatru Salesjan fi Triq Howard, Tas-Sliema, nhar is-Sibt, 4 ta' April, fis-7.30p.m. u l-Ħadd, 5 ta' April, fis-6.30p.m. Parkeġġ b'xejn fil-bitħa tas-Salesjani.

• It-Tnejn, 30 Marzu, 2009 - Poeżijaplus tfakkar lil Charles Camilleri. Sala Isouard, Teatru Manoel

• Wirja f'ġieħ Ġorġ Pisani - Ftuħ tal-wirja fis-Sala tal-Ministeru ta' Għawdex nhar is-Sibt, 28 ta' Marzu, fis-7pm.

• Letteratura Gay minn Malta u mid-dinja: Website/Blog gdida. Sinjuri, Għandi pjaċir inħabbrilkom it-tnedija ta' sajt letterarja ġdida fuq l-internet li se tkun qed tilqa' u xxandar kitbiet b'temi omosesswali (gay, lesbjana, bisesswali u transġender pero mhux biss) minn Malta kif ukoll barra minn xtutna.
  Ilkoll nafu kif fil-letteraturi ta' pajjiżi barranin, kittieba u artisti famużi b'orjentazzjoni sesswali differenti bħal Oscar Wilde, E. M.Forster, Michelangelo, Susan Sonntag, Sappho, Platun, Jean Genet, Andre Gide, Luis Cernuda, Federico Garcia Lorca, Joe Orton, Alan Ginsberg, Jack Kerouac u Walt Whitman ħallew il-marka tagħhom fil-letteratura. Nistgħu insemmu il-famuża De Profundis ta' Oscar Wilde kif ukoll ir-rumanz sigriet "Maurice" (ippubblikat wara mewtu) tal-bravu kittieb Ingliż E.M.Forster. Nistgħu insemmu wkoll in-novella ta' Anne Proulx "Brokeback Mountain" li fuqha nħadem il-film famuż ta' Ang Lee.
  Hawn Malta, kemm minħabba ċ-ċokon kif ukoll minħabba it-tabu' li xi ftit jew wisq għadu jgħatti din it-tema, ftit li xejn għandna kitbiet espliċitament b'tematika gay u wieħed mill-għanijiet ta' din il-website ġdida hija li nagħmlu wkoll dokumentazzjoni tal-kitbiet b'tematika gay mill-gżejjer Maltin. Tafu b'xogħlijiet bħal dawn?
  L-indirizz tas-site huwa: http://letteraturagay.blogspot.com/ Bħalissa s-sajt għadha qegħda tinbena, u għalhekk nitlobkom biex jekk għandkom xi kitbiet jew artikli letterarji b'tematika gay tibgħatuhom fuq dan l-email: letteraturagay@gmail.com biex jiġu ippubblikati fuq il-blog. Nitlobkom ukoll biex ixxerrdu l-kelma lil ħbieb tagħkom u anke permezz ta' xi email lists li jista' jkollkom. Niżżikom ħajr bil-quddiem u nselli ħafna għalikom. (Daniel f'isem it-Tim Letteratura Gay)

• L-Għaqda Poeti u l-Kunsill Nazzjonali Maltin tan-Nisa se jorganizza Ċelebrazzjoni Jum Il-Mara. Il-Ġimgħa, 20 ta’ Marzu 2009, fis-7:00 pm, fis-sala tas-Soċjetà ta’ l-Arti, Manifattura u Kummerċ, Triq Ir-Repubblika, il-Belt Valletta. Kulħadd mistieden. Jekk tixtieq tattendi ikteb lil ncwmalta@camline.net.mt jew ċempel 2124 8881 / 2124 6982.

• German Linguistics Professor inaugurates small library of books in Maltese at the University of Bremen On 18th March 2009, Malta’s Honorary Consul-General in Bremen, Dr. Thomas Stöcker, and Prof. Thomas Stolz, Professor of Linguistics at the University of Bremen, inaugurated the ‘Maltese Library’ situated within the Linguistic Department of the University of Bremen. With 375 volumes, this is one of the largest collections of Maltese literature outside the Maltese islands. Read the article here

• On the initiative of the Embassy of Malta in Berlin and in conjunction with the Malta Council for Culture and the Arts, Maltese poet Antoine Cassar this year participated in the literature project “Small Languages – Great Literatures” (a joint project by several Cultural institutes/departments from European countries) at the annual Leipzig Book Fair and also in Berlin. The purpose behind the initiative comes in line with one of the Ministry of Foreign Affairs’ Strategic Objectives, namely the promotion and increased visibility of Maltese literature and culture in Germany. Read the article here

• Istituto Italiano di Cultura, lunedì 9 marzo, ore 18.30. Oliver Friggieri presenterà il libro Dun Karm. Le poesie italiane. Interventi di Ugo Mifsud Bonnici, Joseph Brincat e Joseph Eynaud.

• BDL Book Sale. Pre-Stocktake clearance on a wide variety of books including Melitensia & children’s books. Mon 9th - Sat 14th March, 2009: Weekdays 10.00am - 6.00pm; Saturday 10am - 1.00pm. 13, Giorgio Preca Str, San Gwann. Just off main road, direction towards Naxxar. (behind Junior’s Leisure Store), Book Distributors Limited (BDL). Tel: 2138 0351/2

• FestaKtieb '09 / Bookbonanza - PEG Ltd. se jorganizza din il-Fiera tal-kotba, bi prezzijiet tajbin ħafna (sa 50% roħs), nhar il-Ħamis 19 ta' Marzu (10.00am - 8.30pm), il-Ġimgħa 20 (4.00pm-8.30pm), is-Sibt 21 (10.00am - 8.30pm), u l-Ħadd 22 ta' Marzu (10.00am - 8.30pm) fil-kwartieri ġenerali tal-Iscouts, il-Furjana, quddiem il-Knisja ta' Sarria. Kotba ta' kull tip u b'lingwi differenti. Għal aktar tagħrif ara s-sit www.peg.com.mt.

• Dante u d-Divina Commedia. VersAgħtini IKM qed jorganizza sensiela ta' 5 laqgħat bil-Malti, dwar Dante u d-Divina Commedia għal studenti fil-livell Post-Sekondarju. Dawn il-laqgħat jibdew is-Sibt 18 t'April fil-5.00pm fil-Mużew tas-Santwarju Madonna tal-Grazzja Ħaż-Żabbar. Ħlas ta' reġistrazzjoni ta' €10 jsir is-Sibt 18 t'April bejn l-4.00pm u l-5.00pm. L-awtur traduttur-poeta Alfred Palma se jmexxi dawn il-laqgħat. Biex tibbukkja u għal aktar tagħrif ċempel lil Miriam Cassar fuq 2166 7001 jew 9922 6186 jew ikteb lil marla@onvol.net.

• Jinħatar il-ħames Kunsill Nazzjonali tal-Ktieb (Marzu 2009)

• Tnedija ta' Id-Demm Nieżel Bħax-Xita (Edizzjoni Skarta, 2009), 15-il awtur u awtriċi b'solidarjetà man-nies ta' Gaża, se ssir nhar il-Ħamis, 5 ta' Marzu, 2009, fis-7.30pm, fiċ-Ċentru tad-Drama Mikelanġ Borg fi Blata l-Bajda. Kulħadd mistieden. Inbid u ikel wara t-tnedija. Fit-tnedija se jieħdu sehem il-kantawturi Vince Fabri u Lara Vassallo u se jitkellem Patri Ġwann Xerri OP. L-edituri ta' din il-ġabra huma Adrian Grima u Karl Schembri, waqt li d-disinn tal-qoxra sar minn Jonathan Grima. www.skarta.org

• Fil-paġna letterarja tal-gazzetta Il-Ġensillum tal-21 ta’ Frar, 2009, dehret intervista ta' Olivia Borg ma' Maria Grech Ganado.

• Erba' Poeti Qabel is-Sawm - Is-Sibt, 21 ta' Frar, fis-7.30pm, f'Bieb is-Sultan, Ħaż-Żabbar, il-bini storiku ħdejn il-kumpless sportiv tal-Kottonera, Adrian Grima, Immanuel Mifsud, John P. Portelli, u Terence Portelli se jaqraw mix-xogħol li ppubblikaw dan l-aħħar. Id-dħul huwa b'xejn. Dan l-aħħar dawn l-erba' poeti ħarġu tliet kotba ta' poeżija bil-Malti. Adrian Grima u Immanuel Mifsud ħarġu Riħ min-Nofsinhar. It-tibdil fil-klima skont Immanuel Mifsud u Adrian Grima (Edizzjoni Skarta, 2008). Il-poeta Malti John P. Portelli, li huwa professur tal-Edukazzjoni f'Toronto, il-Kanada, ħareġ il-ġabra Taħt iċ-Ċirasa/Under the Cherry Tree (PEG 2008), waqt li Terence Portelli ppubblika ġabra ta' ħajku u senriju bl-isem ta' Stoppini u Suffarelli/Sparkles and Whistles (KKM, 2008). L-organizzazzjoni hija f'idejn Inizjamed u Poeżijaplus. Din l-attività se ssir bil-kollaborazzjoni ta' VersAgħtini Il-Kelma Maltija. L-organizzaturi jixtiequ jirringrazzjaw lis-Sur Mario Farrugia tal-Fondazzjoni Wirt Artna. Ara www.inizjamed.org

• Nhar il-Ġimgħa, 13 ta' Frar, il-PBS xandar intervista bit-telefon mal-kittieba Maltja-Awstraljana Dr. Lou Drofenik waqt l-Aħbarijiet tat-8.00pm. Is-servizz inqeda b'filmati ta' Lou u r-raġel tagħha minn edizzjoni ta' Waltzing Matilda. Agħfsu fuq din il-ħolqa. Is-servizz jibda fl-14-il minuta u 13-il sekonda.http://public.di-ve.com/streaming/on_demand_media_streamer.aspx?id=2140&encoding=8&backUrl=streaming/on_demand_event_encoding.aspx?id=2140

• Merlin Library se jniedi l-ġabra ta' novelli ta' Pierre J. Mejlak, Qed Nistenniek Nieżla max-Xita, nhar il-Ħamis, 12 ta' Frar, fis-7:30pm, fil-kantina tal-Chiaroscuro fi Strada Stretta, il-Belt Valletta.

• Il-Festival "Ballati, Ħrejjef u Leġġendi," har il-Ġimgħa 20 ta’ Frar 2009, fis-7.00p.m., fil-Mużew tas-Santwarju, Ħaż-Żabbar. Mistednin Speċjali: Dr Bruno Herin mill-Belġju u Ms Maria Ferstl mill-Awstrija. Bis-sehem tal-kantawtur Malti Walter MicallefOrganizzat minn VersAgħtini - IL-KELMA MALTIJA, flimkien mal-Ħbieb Mużew tas-Santwarju Madonna tal-Grazzja Ħaż-Żabbar. Biex ifakkru l-Jum Internazzjonali ta’ Lsien Pajjiżi imwaqqaf mill-UNESCO fl-1999. Kulmin għandu għal qalbu l-ilsien Malti huwa mistieden.

• Nhar it-Tnejn 26 ta’ Jannar, fis-7.30 pm. Trevor Żaħra jippreżenta kitbiet ġodda f’Poeżijaplus. L-awtur Trevor Żahra se jippreżenta numru ta’ xogħlijiet ġodda waqt l-ewwel edizzjoni ta’ Poeżijaplus għas-sena 2009. Se jieħdu sehem ukoll il-kompożitur Ruben Zahra u Nafra, flimkien mal-atturi Simone Spiteri, Antonella Galea Loffreda, Joe Galea u Ninette Micallef. L-attività se ssir fil-Bitħa tat-Teatru Manoel nhar it-Tnejn 26 ta’ Jannar, fis-7.30 p.m. http://www.poezijaplus.com/XiJmiss.html Dħul b' Xejn.

• Nhar l-Erbgħa 7 ta’ Jannar, Chiaroscuro (ex-Labyrinth), Triq id-Dejqa, il-Belt, fit-8.00pm. "Id-Demm Nieżel Bħax-Xita." Poeżija u mużika b’solidarjetà mal-poplu Palestinjan. Awturi u kantanti Maltin kontra l-aggressjoni Iżraeljana. Jieħdu sehem Adrian Grima, Mario Azzopardi, Walid Nabhan, Karl Schembri, Caldon Mercieca, Sanaa el Nahhal, Vince Fabri, Immanuel Mifsud, u Lara Vassallo.

• Oliver Friggieri il-mistieden speċjali f'Bondiplus, it-Tnejn, 5 ta' Jannar 2009, 20:40pm. "Oliver hu s-saħħar tal-kelma Maltija.” President Emeritus, Ugo Mifsud Bonnici. "Friggieri wera x'saħħa għandha l-kelma mikuba. Tifkiriet importanti għalih u għal Malta." Lino Spiteri. “Naqra dan il-ktieb qisni qed naqra x-xogħol letterarju ta' Oliver." Dr Charles Briffa. "Kif bdejt naqra l-ktieb ma stajtx nitilqu minn idi." Dr Philip Farrugia Randon.

• L-ewwel rumanz bil-Malti ta' Anton Sammut, Alte Vestiga (ambjentat fil-Bavarja tal- ermanja bejn l-1890 – 1990… imma mhux biss). "Kif tista’ tistħarreġ il-ħsieb tar-“ritorn etern” li qiegħed fil-qalba tar-rumanz ta’ Anton Sammut mingħajr ma tagħti każ li l-binja tar-rumanz innifisha mhix għajr l-iskrizzjoni ta’ dan il-hsieb? Għaldaqstant, il-qarrej għandu mnejn japprezzah aħjar jekk ikollu daqsxejn ta’ inkwadratura tal-Filosofija ta’ l-Istorja, b’referenza speċjali għal Nietzsche li huwa l-isfond mhux biss ta’ xi konversazzjonijiet li fih il-ktieb, imma ta’ l-istess struttura tar-rumanz…" - Rev. Prof. Peter Serracino Inglott. Ibgħat il-kummenti li altevestiga.sammut@gmail.com.

• Ħareġ Il-Letteratura Maltija: L-Istorja tan-Narrattiva ta' Charles Briffa (Malta University Publishing, 2008), pp. 1176. Dan il-volum jipprova jitfa’ lil kull min ta sehmu fin-narrattiva Maltija minn żmien De Soldanis ‘l hawn f’qafas teoretiku. Isemmi l-prożaturi ewlenin bi studju fuq il-biċċa l-kbira minnhom. Jidħlu dawk li kitbu r-rumanzi u n-novelli, u xi wħud minn dawk li kitbu l-esejs u xi drammi. Kull awtur jitpoġġa fil-qafas letterarju tiegħu.
  Fl-Introduzzjoni tal-ktieb Briffa jgħid, fost l-oħrajn: “Dan il-volum jipprova juri x’kellu l-ħila jagħmel il-moħħ letterarju f’medda ta’ żewġ sekli u nofs fuq blata ċkejkna f’nofs il-Mediterran maħsula bi stakkaturi ta’ mewġiet politiċi differenti. Għalhekk, jagħti, qabel xejn, il-ġrajja tan-narrattiva Maltija minn twelidha sal-maturità tagħha fil-bidu tas-seklu XXI. Hija ġrajja li tindika u tesponi l-invenzjoni u l-vitalità kreattiva li għandhom ir-rumanz u n-novella, u għalhekk dan l-istudju jidderieġi l-enerġiji tiegħu biex jippreżenta l-iżvilupp tan-narrattiva letterarja f’Malta f’dawn l-aħħar żewġ sekli u nofs. Aktar ma jilħqu kittieba ġodda aktar għandna bżonn nassessjaw il-kitbiet tagħna biex nagħmlu sens minna nfusna. Id-diviżjonijiet storiċi ġenerali li l-volum jadotta jipprovdu qafas siewi għall-analiżi, u t-taqsimiet bejn il-ġeneri huma biss konvenjenza għall-kritika minħabba li l-karatteristiċi li jintużaw fin-novella jintużaw ukoll fir-rumanz; il-volum jagħmilha ċara din il-ħaġa (għax huma karatteristiċi marbutin mal-“fiction”).

• Il-kunċert "Armaġużarma" tal-Brikkuni se jsir is-Sibt, 3 ta' Jannar, 2009, fis-7.30pm fit-teatru tal-MITP fi Triq San Kristofru, il-Belt Valletta.

• Ħareġ il-ktejjeb tal-poeta Antoine Cassar, Mużajk, an exploration in multilingual verse (Edizzjoni Skarta, 2008), li fih kull poeżija fiha versi b'għadd ta' lingwi, fosthom bil-Malti. Stampat il-Lussemburgu.

• Fis-17 ta' Dicembru, fis-7.30 pm fiċ-Ċentru tad-Drama Mikelanġ Borg il-Blata l-Bajda se jittella' collage ta' teatru fiżiku bbazat fuq selezzjoni ta' poeżiji tal-poeta Palestinjan Mahmoud Darwish. Għad-dħul se jintalab ħlas nominali ta' €2.50 ir-ras.

• Ir-rumanz Ramon u ż-Żerbinotti ta' Ġużè Stagno - Riċensjoni ta' Mario Cassar

• Ġieħ ir-Repubblika għall-Kittieba Maltin. Il-Kunsill Nazzjonali tal-Ktieb jifraħ bl-aħbar li Patri Mikiel Fsadni, il-Professur Joe Friggieri u s-Sur Lino Spiteri ngħataw Ġieħ ir-Repubblika f'Diċembru 2008.

• Riżultati tal-Premju Nazzjonali tal-Ktieb għal Kotba ppubblikati fl-2007

• Il-Kunsill Nazzjonali tal-Ktieb fl-attivitajiet għall-Jum Dinji għat-Tfal 2008 u aħbar sabiħa dwar dramm ta' Clare Azzopardi. Ara dan il-Folju.

• Tislima lil Kilin mill-Kunsill Nazzjonali tal-Ktieb

Agenda

BDL (Book Distributors Ltd.)

Inizjamed (www.inizjamed.org)

KKM (Klabb Kotba Maltin)

MAPA - Malta Authors and Publishers Alliance

Mireva (Triq it-Torri, l-Imsida)

PEG (Publishers Enterprises Group) (Qasam Industrijali, San Ġwann)

PIN (Pubblikazzjonijiet Indipendenza)

Ixtri l-Kotba tal-Letteratura bil-Malti bl-Internet

A. C. Aquilina  (maltabook.com)

Book Distributors Limited e-shop

ktieb.com

Malta Online Bookshop

Merlin Library

PEG Online Bookshop

Ħwienet Ewlenin tal-Kotba li Jbigħu Letteratura bil-Malti

A. C. Aquilina (Triq ir-Repubblika, il-Belt Valletta)

Agenda Bookshops

Agius & Agius (878, St. Joseph High Street, il-Ħamrun)

BDL Ltd. (13, Triq Giorgio Preca, San Ġwann)

Merlin Library (Triq Mountbatten, Blata l-Bajda)

Mireva Bookshop (Triq Mons Carmelo Zammit, l-Imsida, Tel. 2131 2616 )

PEG Book Centre (115, Triq San Ġwann, il-Belt Valletta)

Ara wkoll din il-lista

Distributuri tal-Kotba tal-Letteratura f'Malta

F'dan is-sit tal-Paġni s-Sofor hemm lista ta' Distributuri Maltin tal-Kotba

Book Distributors (BDL) Ltd

13 Triq Giorgio Preca, San Ġwann SGN 07 - Tel. 21 380 351 info@bdlmalta.com

Miller Distributors Ltd
Miller House, Triq Hal Tarxien, Ħal Luqa LQA 05  - Tel. 21 664 488 info@millermalta.com

Sierra Book Distributors
Triq il-Mediterran, The Village, St. Julians STJ 1870 Malta
T: 00356 2137 8576 / 00356 2737 8576 - F: 00356 2137 3785
sales@sierra-books.com - info@sierra-books.com - www.sierra-books.com

Għaqdiet Letterarji

Akkademja tal-Malti

Għaqda Letterarja Maltija

Għaqda Poeti Maltin

Għaqda tal-Malti - Università

Inizjamed

Poeżijaplus - maltapoetry.com

VersAgħtini IL-KELMA MALTIJA VO 50

Charles Casha

Oreste Calleja

Vince Fabri (kantawtur)

Adrian Grima

Simone Inguanez

Ġorġ Mallia

Immanuel Mifsud  l  Tgedwid (blogg)

Trevor Żahra

Aboutmalta - il-Maltin barra minn Malta

Il-Wiki tal-Letteratura Maltija

Tabellina

• Kellimni bil-Malti – kull nhar ta’ Sibt fil-12.15 u t-Tlieta fil-23.35 fuq l-RTK (103 FM), programm ta’ Charles Coleiro li fih il-Prof. Manwel Mifsud iwieġeb il-mistoqsijiet tas-semmiegħa fuq il-lingwa Maltija.

• Wirtna – programm ta’ Sergio Grech kull nhar ta’ Ħamis mis-18.20 sas-19.00 fuq Radju Malta (93.7 FM)

• Ktieb miftuħ - Ġorġ Peresso jippreżenta programm fuq il-kotba fuq Education 22. Jixxandar it-Tlieta fis-6.30 pm u l-Ħadd fin-12.30pm.

• Meander - Immexxi minn Mariella Pisani Bencini. Fuq Television Malta, It-Tlieta fl-10.30pm.

The Malta Writing Programme fi ħdan il-Fondazzjoni għal Servizzi Edukattivi. Korsijiet ta' Kitba Kreattiva ta' 18-il siegħa għat-tfal sa 12-il sena; Korsijiet ta' Kitba Kreattiva għall-Ġenituri fl-istess ħin tal-korsijiet għat-tfal; Workshops ta' Taħriġ għall-Għalliema.
 

Tel: (+356) 21 455600, 21 455607, 21 455653 fax: +356 21 455625.

mwp.fes@gov.mt  l  http://www.fes.org.mt/programmes/m_home.html

Sit elettroniku maħluq (16.6.05) u amministrat minn Adrian Grima. L-aħħar aġġornament: 13.02.10