Membri tal-Kumitat Tekniku tal-Letteratura

Qabelxejn nixtieq nifraħlek tal-ħatra tiegħek bħala membru tal-Kumitat tal-Letteratura fi ħdan il-Kunsill Nazzjonali ta’ l-Ilsien Malti, u nirringrazzjak talli għoġbok tilqa’ din is-sejħa.

Bħala membru tal-Kumitat, inti għandek il-fiduċja kemm tal-Kummissjoni Teknika kif ukoll tal-Kunsill Nazzjonali, li t-tnejn approvaw il-ħatra tiegħek. Jiena wkoll, bħala President tal-Kunsill, għandi pjaċir li se jkolli l-opportunità naħdem miegħek fil-qrib fuq proġett li huwa għal qalbna t-tnejn.

Quddiemna għandna sfida kbira, dik li nagħtu lill-ilsien Malti l-pożizzjoni li tixraqlu bħala mezz ta’ komunikazzjoni effettiv u sinjal ta’ l-identità tal-poplu tagħna. Dan jista’ jsir biss billi, wara li nkunu studjajna l-qagħda u l-użu preżenti tal-Malti fil-qasam partikulari li għalih ġejna msejħa, infasslu flimkien pjan ta’ ħidma għal dan il-qasam, pjan li mbagħad jintegra ruħu mat-tifsil li jkun qed isir fil-kumitati għall-oqsma l-oħra. Dan il-pjan għandu jiġbor fih kemm miri għat-tul kif ukoll miri fil-qrib, iktar urġenti.

Qabel ma nibdew naħdmu flimkien, nixtieq inwasslilkom tliet prinċipji li kienu sa mill-bidu tat-tifsil tal-Liġi tal-Malti u li l-Kunsill qed jagħtihom importanza kbira. Nixtieqek iżżommhom f’moħħok biex jispirawk fix-xogħol kollu tiegħek fi ħdan il-Kunsill:

(1) Inkunu serji. Il-kwalità trid tidher fix-xogħol tagħna u f’kulma nippreżentaw lill-poplu Malti. Irridu nżommu livelli internazzjonali, mhux biex nimitawhom bl-amment imma biex jispirawna bis-serjetà tagħhom. Il-medjokrità ma għandux ikollha post fostna, għax il-kredibilità u l-awtorità tagħna trid tiġi mill-idea għolja li n-nies ikollhom fuqna bħala nies ta’ l-affari tagħna.

(2) Inkunu inklużivi. Għalkemm aħna qed naħdmu volontarjament, il-Kunsill m’huwiex “għaqda volontarja” għax bħala Kunsill Nazzjonali rridu nagħtu kont lill-poplu. Dan il-proġett mhux tagħna biss, imma tal-Maltin kollha. Għalhekk għandu dritt iħossu parti minna kull min għandu l-Malti għal qalbu u jipprova jħaddmu bl-aħjar mod fil-ħajja tiegħu ta’ kuljum, imma wkoll min ma jaqbilx magħna, min jaraha mod ieħor, min għadu mhux konvint. Fil-pjanijiet tagħna rridu ninkludu lill-kelliema kollha tal-lingwa u ninvolvu lil min sa issa kien qed jaħdem favur il-lingwa Maltija, fosthom l-għaqdiet tal-Malti, awturi, ġurnalisti u nies oħra tal-ħsieb. Għax il-Kunsill twaqqaf biex jgħaqqad u jsaħħaħ, mhux biex jifred u jfarrak.

(3) Inkunu ġentili. Din se tkun karatteristika li tagħżel l-attitudni tal-Kunsill minn kulma sar sa issa. Il-kelliema, il-kittieba, il-ġurnalisti tal-Malti sa issa aktarx sabu ħafna min jaħtafhom, jikkritikahom u jiċċensurahom; sabu inqas min jgħinhom u jiftħilhom għajnejhom. Nistgħu nkunu sodi imma ġentili, effettivi imma edukati, xjentifiċi imma umli. Għax jekk f’xi ħaġa nafu iktar mill-oħrajn, aktarx li fi ħwejjeġ oħra jgħallmuna. Irridu noffru għajnuna, servizz tajjeb u bit-tbissima. Jien fiduċjuż li n-nies jagħtuk dak li tagħtihom, u li se jkunu iktar disposti biex jisimgħu, jifhmu u jissieħbu magħna la nkunu ġentili lejhom.